Өймөкөөн улууһугар бүгүн 17 быыбардыыр учаастак үлэлиир. 6332 быыбардааччы испииһэккэ киирдэ.
edersaas.ru
— Сарсыарда 8 ч. учаастактар ааннара аһыллыахтарын инниттэн дьон бөҕө быыбардаары уочараттаан тураллар. Бу маннык көстүү урут хаһан да суоҕа, — диэн кэпсиир улуустааҕы «Хотугу сардаҥа» хаһыат суруналыыһа Любовь Кривошапкина.
Айар үлэһит эбиэт кэнниттэн фотоаппараатын туппутунан улуус киинин быыбардыыр учаастактарын кэрийэн анал репортаж оҥордо.
Оттон Ил Түмэн дьокутаата Василий Местников бүгүн дойдутугар Өймөкөөҥҥө анаан тиийэн куоластаата.
— Дойдум инники дьылҕата хас биирдиибит киниэхэ сыһыаныттан тутулуктаах. Олохпутун түстүүр суолталаах тэрээһиҥҥэ төрөөбүт Өймөкөөнүм дьонун кытта дойдум сааскы салгынынан тыынан, биир санааланыым — олоҕум умнуллубат түгэнэ, — диэн бэлиэтииир норуот дьокутаата.
Оттон Үчүгэй олохтоохторо Виталий уонна Тамара Поповтар бары быыбардарга аан бастакынан быыбардыыр дьон быһыытынан кэпсээҥҥэ сылдьаллар. Бүгүн да Поповтар ыал дойду суолталаах быыбарыгар учаастак аанын бастакынан арыйдылар.
Төрүт нэһилиэгин кырдьаҕас быыбардааччыта Анна Слепцова быыбары эдэр сааһыттан көтүппэт. Онтон кини биир дойдулааҕа, оскуола киэн туттар үөрэнээччитэ, спортсменката, быйыл сокуоннай 18 cааһын туолбут эдэркээн
Аня Стручкова аан бастаан быыбардаата. Киниэхэ тирии истээх пааспар хаҕын бэлэхтээтилэр. Бу өйдөбүнньүк бэлэх, биллэн тутар, кыысчаан олоҕун кылаабынай докумуонун харысхалынан буолуоҕа.
Сордоҥноох нэһилиэгин актыбыынай уопсастыбынньыга Ирина Цыренова Вензель аймах болдьоспут курдук биир чааска кулууп дьиэҕэ быыбарга көрсө түспүттэриттэн олуһун соһуйда. Бары тус-туспа ыал биир чааска быыбардыы кэлэн, санаалара биириттэн үөрэн, хаартыскаҕа түстүлэр.
Оттон Өймөкөөн нэһилиэгинээҕи оҕо саадын үлэһиттэрэ үлэлэригэр мустан, бары күргүөмүнэн оҥостон кэлэн, 100% куоластаан бардылар. Ыраахтан шариктаах, былаахтаах, улуустарын гербэтин инники күөҥҥэ тутан иһэр дьахталлары көрөн, үгүстэр быыбарга параадтаан иһэллэр дуу санаабыттара чахчы!
Томтор кэрэ куолара Быыбар күн кулуупка сахалыы таҥнан-симэнэн, киэргэнэн, куоластыы кэллилэр.
Арассыыйа Дьоруойа Игорь Хоменко аатынан Уус-Ньара орто оскуолатын эбии үөрэхтээһиҥҥэ педагога Тамара Федорова Быыбардыыр учаастакка саха кыһыҥҥы таҥаһын тигэн, быыстапкаҕа туруорбутун быыбардааччылар олус сэргии көрдүлэр.
Ити курдук, сарсыарда лоп курдук 8 чаастан 60-тан тахса араас омук олорор интернациональнай Өймөкөөн улууһун олохтоохторо дойду бэрэсидьиэнин талар быһаарыылаах быыбарга хото кытыннылар.
Елена ПОТОЦКАЯ, «Саха сирэ» хаһыат, edersaas.ru