Доруобуйа Уопсастыба

Өймөкөөннөр быһыыны ыларга дьулуһаллар

Өймөкөөн улууһугар сыстыганнаах дьаҥ балаһыанньата билигин да тыҥааһыннаах.

Ол курдук өрөспүүбүлүкэтээҕи суһал ыстаап күн аайы сыстыганнаах дьаҥынан сутуллубут дьон ахсаанын улуустарынан холобурдуур чахчытыгар Өймөөкөөн улууһа өрүү  баар. Уопсайа бу сыл саҥатыттан Өймөкөөн улууһугар 711 киһи сыстыганнаах дьаҥынан ыарыйда. Кэнники 10 хонукка 76 киһи коронавируска сутулунна.

Улуустааҕы балыыһа кылаабынай бырааһа Ираида Харлампьева иһитиннэрбитинэн, соторутааҕыта  лабораторнай анаалыс туттарбыт дьонтон  65-һэ бигэргэнэн, улуустааҕы балыыһаҕа эмтэнэллэр. Бу күннэргэ  Уус Ньара  —  46 киһи. (12 оҕо), көмүс хостуур тэрилтэлэр — 7 киһи, Томтор нэһилиэгэ — 18 киһи (5 оҕо), Сордоҥноох 2 киһи (3 оҕо), Өймөкөөн, Аартык, Төрүт нэһилиэктэрэ – 1-дии киһи.

Улууска уопсайа 4126 киһи — нэһилиэнньэ 63%-на быһыыны ылла.  СӨ Доруобуйа харыстабылын министиэристибэтэ улууска быһыыны ылыыга туруорбут былаана — 4825 киһи. Ол эбэтэр былаан 85% туолла.

Биири бэлиэтиир тоҕоостоох — уруккуга тэҥнээтэххэ, билигин улуус киинин үгүс дьиэлэрин эркиннэригэр араас уруһуйу кытта тэҥҥэ «Коронавируһу кыайыахпыт!» диэн сурук үксээбитэ — дьон бу дьаҥтан салгыбытын, түргэнник суох оҥоруон баҕарарын бэлиэтэ.

Улуус баһылыга Иннокентий Сивцев иһитиннэрбитинэн, бу күннэргэ быһыыны  ылыыны көҕүлүүр сыалтан алтынньы 25 күнүттэн сэтинньи 7 күнүгэр диэри быһыыны ылбыт дьоҥҥо анаан инстаграм нөҥүө быһа эпииргэ сыаналаах бириистэри сүүйүү тэрээһинэ ыытылынна.

 

Елена ПОТОЦКАЯ, “Саха сирэ” хаһыат, edersaas.ru

 

 

 

0
0
Telegram @edersaas20