Уопсастыба

Өймөкөөн ыччата Украинаҕа хорсун быһыыны оҥордо

Бу күннэргэ Саха сириттэн Украинаҕа анал байыаннай операцияҕа кыттааччылар төрөөбүт дойдуларын көмүскэлин иһин хорсун быһыыны көрдөрөллөр.

Кинилэр ортолоругар Тымныы полюһа Өймөкөөн улууһун Биэрэк Үрдэ нэһилиэгиттэн төрүттээх Сергей Васильев баар. Кини  аатын бу күннэргэ Оборона министиэристибэтэ Арассыыйа байыаннайдарын дьоруойдуу быһыыларын холобурдууругар ааттаата.

Старшина Сергей Васильев десантниктар бөлөхтөрүгэр сылдьан, утарылыһааччы пулеметунан ытыалыыр олбоҕун бэлиэтии көрбүт уонна гранатаны быраҕан,  пулеметчигы тохтоппут. Сергей Васильев биэс националистан табаарыстарын быыһаан ылан, салгыы байыастар соруктарын туох да харгыһа суох толорбуттар.

Биир дойдулааҕа Александр Колесов  Өймөкөөн улууһун Биэрэк Үрдүн уола Сергей Васильев туһунан маннык иһитиннэрдэ:

— Сергей хантарааҕынан Уссурийскайга сулууспалыыр. Байыаннай дьайыыга бааһыран баран, госпитальга сыппыта. Онтон тахсан, дойдутугар Саха сиригэр дьонун-сэргэтин кытта көрсөн баран, сулууспалыыр чааһыгар барда. Манна сылдьар кэмигэр Ил Түмэн дьокутаатын Сахамин Афанасьевы кытта көрүстэ. 

Өймөкөөн улууһун ыһыаҕар улуус салалтата хорсун буойун Сергей Васильевка «Гражданскай килбиэн» бочуоттаах бэлиэни  туттарбыта.

 

Елена ПОТОЦКАЯ, «Саха сирэ» хаһыат».

 

Хаартыска, Өймөкөөн улууһун батсаап бөлөхтөрүттэн.

 

3
0
Telegram @edersaas20