Бу күннэргэ Өймөкөөн улууһугар эһиил ыытыллар Олоҥхо ыһыаҕар бэлэмнэнии чэрчитинэн Томтор нэһилиэгэр араас таһымнаах сүбэ мунньахтар, маастар-кылаастар ыытыллан эрэллэр.
Бүгүн Томтор нэһилиэгэр киин улуустартан тимир уустара кэлэн маастар-кылаас ыыппыттарын туһунан улуус дьаһалтатын Олоҥхо ыһыаҕын ыытыыга эппиэттээх бэрэстэбиитэлэ Никифор Протопопов иһитиннэрдэ:
— Нэдиэлэ саҥатыгар өрөспүүбүлүкэҕэ биллэр тимир уустара: Нам улууһун Таастааҕыттан Василий Герасимов, Бүлүү улууһун Тааһаҕарыттан Николай Шамаев, Уус Алдан Сыырдааҕыттан Илларион Попов уонна Афанасий Шепелев, Чурапчы улууһуттан Николай Барашков Томторго анаан кэлэн болгуо уһаарыытыгар нэһилиэк эр дьонугар маастар-кылаас ыыттылар.
Томтор нэһилиэгин олохтоохторо Олоҥхо Ыһыаҕа ыытыллыбыт улуустарыттан ким туох кыахтааҕынан кэлэн, тимири уһаарыыга, маһынан уһаныыга, иискэ маастар-кылаастары биэрэн, уопуттарын атастаһан баралларыгар барҕа махталларын тиэрдэллэр.
Ити курдук, ыраахтан-чугастан ыраах Тымныы полюһугар Өймөкөөҥҥө ыытыллар Олоҥхо ыһыаҕар өрөспүүбүлүкэ олохтоохторо бары бүттүүн көмөлөһөллөрө, өйүүллэрэ хайҕаллаах суол.
Елена ПОТОЦКАЯ, «Саха сирэ» хаһыат.
Хаартыска: Никифор Протопопов тиксэриитэ.