Маны аах Уопсастыба

Өймөкөөн улууһун Төрүтүгэр түргэн интэриниэт лиинийэтин тардаллар

Бу күннэргэ Өймөкөөн улууһун Төрүт нэһилиэгэр оптоволокно лиинийэтин тардан эрэллэр.

Нэһилиэк баһылыгын э.т. Алексей Кондаков иһитиннэрбитинэн, «Импульс» ПАО тэрилтэ үлэһиттэрэ оптоволокно лиинийэтин бөһүөлэк устун тардар сирин тыраахтарынан тыырдылар.

Аҕыйах хонугунан олохтоох дьаһалтаҕа бастаан оптоволокно холбонор тэрилин туруоруохтара, онтон салгыы дьиэлэринэн сылдьан лиинийэни тардыахтара.

— Төрүт — Өймөкөөн улууһугар оптоволокно лиинийэтэ холбонор бүтэһик нэһилиэгэ. Үлэ түмүктэннэр эрэ, Тымныы полюһун бары нэһилиэктэрэ 100 % түргэн интэриниэккэ холбоммутунан ааҕыллыахтара, — диэн бэлиэтээтэ улуус баһылыга Иннокентий Сивцев.

Оптоволокно сибээһэ улуус киинигэр Уус-Ньараҕа уонна тыа сирин нэһилиэктэригэр субу-субу сүтэн хааларын истэ-билэ олорон, олохтоохтор эмиэ да сэрэхэчийэллэр. Ол эрээри, түргэн интэриниэт ааттыын да түргэн буолан, төрүттэр оптоволокно олоххо киирэрин эрэнэ кэтэһэллэр.

 

Елена ПОТОЦКАЯ.

 

2
0