Бу күннэргэ уһун ардах кэнниттэн хайа хаара ууллан, Өймөкөөн улууһун нэһилиэктэригэр суолунан тырааныспар сырыытыгар кэккэ мэһэйдэри үөскэттэ.
edersaas.ru
Сыл аайы бу кэмҥэ айан суола алдьанар буолан, олохтоохтор сырыы аайы эрэйдэнэллэр.
Соторутааҕыта Дьокуускайтан Томтордоон иһэр уонна Өймкөөн диэкиттэн киин куоракка айаннаан иһэр массыыналар эмиэ суол алдьанан, икки өттүттэн хаайтаран хааллылар.
От ыйын 22 күнүгэр Томтор нэһилиэгин баһылыга Никифор Протопопов суол алдьаммытынан сибээстээн, айан сырыытын тохтотор туһунан дьаһалга илии баттаабыта.
Оттон бүгүн, от ыйын 23 күнүгэр, күүстээх ардах түһэн, ыксаллаах быһыы-майгы тахсарын бопсор инниттэн «Халыма» федеральнай суол 727 килэмиэтиригэр «Күбүмэ-Куйдуһун — Индигиир өрүс» туһаайыынан тырааныспар бары көрүҥэ сылдьара бобуллубутун туһунан 342-06 №-дээх бирикээскэ «СӨ Массыына суолун управлениета» судаарыстыбаннай тэрилтэ салайааччыта Семен Филиппов илии баттаата. Тэрилтэ массыына суолун туһаныыга отделын үлэһиттэрэ бэлиэтииллэринэн, Өймөкөөн улууһун тыатын куустатыгар айанныыр суол үс учаастагын хайаттан түһэр уу киирэн алдьаппыт.
Ону чөлүгэр түһэрэр үлэни Томтордооҕу Александр Долженков салайар «Бриз» тэрилтэтин суолу өрөмүөннээччилэрэ уу түстэҕинэ ыытыахтара.
Бу күннэргэ суол алдьаммыт учаастактарын өрөмүөннүүр соруктаах суолу оҥорооччулар биригээдэлэрэ айаҥҥа турунна. Чугастааҕы кэминэн сырыыны бобор бэлиэлэри туруоруохтара.
Ыксаллаах быһыы-майгы тахсарын бопсор дьаһаллар тахсыахтарын иннинэ Дьокуускайтан айаҥҥа туруммут тыа сирин олохтоохторо кырачаан оҕолорун кытта Күбүмэҕэ хаайтаран олороллорун туһунан батсаапка илдьит кэллэ. Бөртөлүөт көрдөөн көрбүттэр да, кыаллыбатах.
Кинилэр бары «Куба» диэн аатынан биллэр остолобуойга олорон, уу түһэн, суол оҥоһулларын кэтэһэ олороллор.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.