Бу күннэргэ Өймөкөөн улууһун киинигэр Уус Ньараҕа “Персей” ХЭУо көрөр-истэр канализациятын 48 механизированнай ыстаансыйата ититии систиэмэтигэр холбоммокко турар.
edersaas.ru
Оттон Тымныы полюһугар бу күннэргэ түүн 15 кыраадыска тиийэ тымныйар буолла. Канализация ыстаансыйаларын ититиигэ холбооһун туох төрүөтүнэн атахтаммытын муниципальнай тэриллии баһылыгын 1-кы солбуйааччы Игорь Водовозов бу курдук быһаарар:
— Канализация ыстаансыйаларын көрөр-истэр “Персей” ХЭУо улуус киинин ититиинэн хааччыйар “Теплоэнергосервис” акционернай тэрилтэҕэ былырыыҥҥыттан 9 мөл. солк. тахса иэстэммит. Онон сыл аайы ититии сезона саҕаланыытыгар бу тэрилтэ иэһиттэн сылтаан мөккүөр үөскүүр.
“Персей” ХЭУо салайааччыта Валентин Исаев бэлиэтииринэн, СӨ Субсидияҕа агентствота ый аайы ыытыахтаах үбүлээһинин үстүү ыйга диэри уһатар буолан, хамнаһы, нолуогу, иэһи-күүһү төлөөһүҥҥэ харгыстар үөскүүллэр. Ититии сезона саҕаланыытыгар бу төрүөттэн сылтаан кыстыкка киирии өрүү олус ыараханнык саҕаланар.
Алтынньы 4 күнүгэр улуус салалтата ФСБ, ИДьО үлэһиттэрэ кыттыылаах икки мөккүөрдээх тэрилтэлэр салайааччыларын кытта киэҥ ыҥырыылаах мунньах ыытта. Хомойуох иһин, өрүттэр бу да сырыыга тыл тылга киирсибэтилэр. Мунньахха “Теплоэнергосервис” тэрилтэ салайааччыта Сергей Федоров акционернай тэрилтэ генеральнай дириэктэрэ В.С. Михалев икки эрэ септигы холбуурга көҥүллээбитин туһунан иһитиннэрдэ. Ону даҕаны уу туттуллуутун бэрэбиэркэлиир счетчиктар үлэлэрин көрөр-истэр эрэ инниттэн. Улуус киинин атын 40-тан тахса септигин туһунан туох да быһаарыы суох.
Оттон күн бүгүн чысхаан тымныылаах Тымныы полюһунан аатырбыт Өймөкөөҥҥө түүн 15 кыраадыска тиийэ тымныйар буолла. Ол эбэтэр тоҥон турар септиктэр тоҕута бараннар, онто да суох инчэҕэй тирбэҕэ быстыбатынан сыккырыыр эрэ тыына тураахтыыр канализация туһаттан тахсара чахчы. Дьиҥэр “Персей” тэрилтэ иэһин төлөөн бүтэрэн эрэр эбит эрээри, “Теплоэнергосервис” тэрилтэтэ ууну туттууну учуоттуур прибордары, насоснай ыстаансыйаларга араас ирдэбиллэри суһаллык толорору булгуччу ирдиир эбит. Оттон ыраах хоту сиргэ сылы быһа оҥоһуллар ирдэбили аҕыйах хонук иһигэр толоро охсубатыҥ биллэр. Онон кыстыкка киирии саамай тыҥааһыннаах кэмигэр “үөрэтэн биэрэ” сылдьан, “Теплоэнегосервис” тэрилтэ Тымныы полюһун киинигэр канализациялары тоҥорон, тыҥааһыннаах балаһыанньаны үөскэтэр чинчилэннэ. Септиктэр номнуо тоҥон, чааһынай дьиэлэр олбуордарыгар, уулуссаларга кирдээх уу халыйан киирдэ.
Бу боппуруоһу суһаллык быһаарар инниттэн “Өймөкөөн улууһа” МТ баһылыгын 1-кы солбуйааччы Игорь Водовозов СӨ бырабыыталыстыбатын бэрэссэдээтэлин 1-кы солбуйааччы Алексей Колодезниковка балаһыанньаны быһааран, официальнай сурук ыытта.
Онон тымныытынан аатырар Өймөкөөн улууһун киинигэр Уус Ньараҕа бырабыыталыстыба болҕомтотун уурарыгар олохтоохтор эрэллэрэ сүҥкэн.
Елена ПОТОЦКАЯ, «Саха сирэ» хаһыат, edersaas.ru