Кэлиҥҥи сылларга Өймөкөөн улууһа олорор дьиэни тутууга бастыҥнар ахсааннарыгар сылдьар. Аҕыйах хонуктааҕыта Уус Ньараҕа ыаллар саҥа дьиэҕэ киирэн малааһын тэрийдилэр.
— 2012 сылтан хаарбах дьиэлэртэн дьону көһөрүү бырагырааматыгар киирсэн үлэ ыытыллыаҕыттан ыла, улуус киинигэр Уус-Ньараҕа 17 дьиэни үлэҕэ киллэрэр соруктаахпыт. 2016 сылга “Стройкон” ХЭТ түөрт дьиэни тутан, олорор дьиэҕэ уочаракка турар дьону дьиэлээтибит. Уопсайа уонтан тахса саҥа дьиэҕэ хаарбах туруктаах дьиэлээх дьону көһөрдүбүт, — диэн кэпсиир улуус муниципалитетын баһылыга Михаил Захаров.
Саҥа дьыл иннинэ дьиэтин күлүүһүн туппут Надежда Аюпова:
— Кыыһым сиэммин кытта харбах дьиэҕэ олорбуттара. Почтаны тиэрдэр үлэлээх буолан, саҥа дьиэлэргэ өрүү сылдьабын, олус сылаастарын бэлиэтиибин. Онон оҕолорум абыраныахтара, — диэн санаатын үллэстэр.
Улуус киинин Энергетическэй уулуссатыгар ааспыт үйэ 60-70-с сылларыгар тутуллубут хаарбах туруктаах бараахтар оннуларыгар саҥа дьиэлэр дьэндэйэн, Уус-Ньара тас көстүүтүн биллэ тупсардылар. “Стройкон” тутуу хампаанньатын маастара Михаил Абрамов бэлиэтииринэн, бу саҥа дьиэ атыттартан атына – кыбартыыра аайы бойлердары туруордулар. Ол эбэтэр олохтоохтор кыһыннары-сайыннары итии уунан туттар буолуохтара.
ЫСПЫРААПКА
Өймөкөөн улууһун киинигэр Уус-Ньараҕа хаарбах дьиэттэн көһөрүү бырагырааматын чэрчитинэн 41 саахалланар туруктаах дьиэ көтүрүллэн, 305 дьиэ кэргэн аныгы тутуулаах таас дьиэлэргэ көһүөхтэрэ, 12 дьиэ кэргэҥҥэ “Уус-Ньара бөһүөлэгэ” МТ дьиэ атыылаһыаҕа, 22 дьиэ кэргэн саахалланар туруктаах кыбартыыларга компенсация төлөбүрүн ылахтара.
Елена ПОТОЦКАЯ.