Бүгүн Өймөкөөн улууһун киинин Уус Ньара олохтоохторо тапталлаах бөһүөлэктэрэ төрүттэммитэ 84 сылын бэлиэтээтилэр.
1937 сыл атырдьах ыйын 6 күнүгэр Ньара өрүскэ Валентин Цареградскай салайааччылаах бастакы геологтар эспэдьиисийэлэрин сөмөлүөтэ кэлэн түспүтэ. Оробуочай бөһүөлэги ханан хайдах тутары быһаарар хамыыһыйа быһаарыытынан бастакы дьиэлэр номнуо ол дьыл кыһыныгар тутуллан барбыттара. Аҕыс дьиэлээх бастакы уулуссаны геологтар “Охотный ряд” диэн ааттаабыттара. Ол кэмҥэ үгүс ыччат оһоҕунан ититиллэр балааккаҕа олороллоро.
Ити курдук илиинэн тутуллубут аҕыс дьиэттэн саҕалаан бүгүҥҥү бүгүҥҥү куораттыы тииптээх Уус Ньара саҕаламмыта. Ол кэмтэн 84 сыл ааста.
Бу сыллар тухары араас омук түөлбэлээн олорор бөһүөлэгэ олох араас очурдарын туораан кэллэ. ГУЛАГ хаайыылахтарын тутар, тула адьырҕа ыт харабыллаах лааҕырдардааҕа, Аҕа дойду Улуу сэриитин саҕана аһыллыбыт бириискэлэр түмсэр кииннэринэн буолбута, Улуу Кыайыы кэнниттэн дойдуга көмүс хостуур бөдөҥ тэрилтэлэр манна түмсүбүттэрэ, Сэбиэскэй кэмҥэ оҕуруот аһын арааһын олордор “Дружба” сопхуос курдук агробазалааҕа, икки улахан орто оскуола тутуллубута, цииркэҕэ тиийэ сайдыылаах “Металлург” култуура дьиэтэ дьэндэйбитэ, чысхаан тымныыга сып-сылаас бассейн тигинэччи үлэлиирэ. Ол барыта 90-с сылларга соҕотохто хаһан да эргиллибэттии симэлийбитэ: дойду сайдыытын түстээбит бириискэлэр сабыллыбыттара, сопхуостар эстибиттэрэ, дьон көһөн баран, Уус Ньара соҕотохто тулаайахсыйа түспүтэ. Ол эрээри кылгас кэм иһигэр эстэ быһыытыйбыт көмүс хостонор Уус Ньара бөһүөлэгэ “ыарыытын” аһарынаат, кини уулуссаларыгар эмиэ бырааһынньыктар буолан барбыттара.
Күн бүгүн олох устун тэтимнээхтик хардыылыыр Уус Ньара чаҕылхай күннээх олоҕун бу хаартыскалар да туоһулууллар.
«Уус Ньара төрүттэммит күнэ – биһиги төрөөбүт дойдубутугар тапталбытын билинэр биир үтүө күммүт. Оҕо саастара ааспыт, манна үөрэммит, олорбут, эдэр эрчимнээх саастарыгар Уус Ньараҕа үлэлээбит, ыал буолан олохсуйбут сирдэрин үгүс киһи ханна да олордор өрүү ахтар-саныыр. Ол курдук, аан дойду араас куораттарыгар, дойду эрэгийиэннэригэр, ыаллыы да нэһилиэккэ олорор дьон дууһаларыгар, сүрэхтэригэр тапталлаах Уус Ньараларын туһунан өйдөбүлү иҥэрэн сылдьаллар, өрүү саныыллар.
Араас омугу биир санааҕа түмэр, сомоҕолуур тапталлаах Уус Ньарабыт өрүү сайда-үүнэ турдун!” – диэн Өймөкөөн улууһун баһылыга Иннокентий Сивцев бүгүн социальнай ситимнэринэн, улуус икки тыллаах “Северная заря» уонна “Хотугу сардаҥа» хаһыаттарынан бэйэтин эҕэрдэтин тиэртэ.
Елена ПОТОЦКАЯ, “Саха сирэ” хаһыат.
Хаартыска: Слава Степанов, boltai.com уонна ааптар түһэриитэ.