Сүрүн Уопсастыба

Өймөкөөн улууһун киин балыыһата суһал көмө массыыналанна

Соторутааҕыта өрөспүүбүлүкэ мэдиссиинэҕэ тэрилтэлэригэр СӨ Бырабыыталыстыбатын бэрэссэдээтэлин солбуйааччы Ольга Балабкина 18 суһал көмө массыынатын күлүүһүн туттарбыта.

Доруобуйа сылыгар Алдан, Горнай, Кэбээйи, Ленскэй, Мииринэй, Нам, Ньурба, Өймөкөөн, Өлүөхүмэ, Сунтаар, Томпо, Хаҥалас, Хатас, Жатай кылаабынай быраастара массыына күлүүстэрин туппуттара. Анал көлөнөн хааччыллыы «Доруобуйа» национальнай бырайыак чэрчитинэн федеральнай бүддьүөттэн үбүлэнэр.

Доруобуйа харыстабылын министиэристибэтин быйылгы былааныгар улуустары суһал көмө массыынатынан  хааччыйыы испииһэгэр Өймөкөөн улууһун киин балыыһата суоҕа. Ону ол диэбэккэ, кылаабынай быраас Ираида Харлампьева ыксаллаах түбэлтэҕэ туһаныллар бары өттүнэн тэриллиилээх мэдиссиинэ суһал массыынатын хайа күн киин балыыһа кылаабынай бырааһынан ананыаҕыттан туруорсубута. Ол төрүөтэ — коронавирус сыстыганнаах дьаҥын саҕана суһал көмө  эргэ массыыналара ыраах сытар, суола-ииһэ мөлтөх нэһилиэктэргэ чаастатык айанныыллара.

— Өймөкөөн улууһун киин балыыһатын кылаабынай бырааһа Ираида Харлампьева министиэристибэҕэ дьаныардаахтык туруорсубутун түмүгэр, улууска иккис ОСМП (ыксаллаах түбэлтэҕэ ыарыһахха үрдүк таһымнаах өҥөнү оҥорор анал этэрээт) суһал массыыната ананна.

Пандемия кэмигэр суһал көмө массыыналара хаһааҥҥытааҕар наада буолбут кэмнэригэр Ираида Харлампьева Доруобуйа харыстабылын министиэриситибэтигэр олохтоохтук туруорсубутун түмүгэр, өймөкөөннөр иккис массыыналарын ыллылар, — диэн Доруобуйа харыстабылын Ресурснай киинин салалтата бэлиэтиир.

Өймөкөөн улууһун киин балыыһатын кылаабынай бырааһа Ираида Харлампьева ыраах Өймөкөөн улууһун олохтоохторун кыһалҕаларын быһаарбыт Доруобуйа харыстабылын министиэристибэтин салайааччыларыгар ис сүрэҕиттэн махталын тиэртэ:

Саҥа ылбыт массыынабыт ыараханнык ыалдьыбыт, эбэтэр оһолго түбэспит дьоҥҥо аналлаах аппаратуранан толору хааччыллыылаах, автономнай уоттаах, кислороднай ыстаансыйалаах, наһыылкалаах станоктаах. Өймөкөөн улууһугар нэһилиэнньэлээх пууннар улуус кииниттэн тэйиччи тураллар. Чаастатык айанныыр буолан, суһал көмө массыыналара сотору-сотору өрөмүөҥҥэ бараллар.

Онон бу аныгы ирдэбилгэ эппиэттиир массыына Тымныы полюһун курдук уустук килиимэттээх хотугу улууска олус наадатын өйдөөбүт уонна өйөөбүт урукку миниистир Елена Борисоваҕа уонна билигин үлэлии олорор миниистир Лена Афанасьеваҕа истиҥ махталабын тиэрдэбин.

Халыма-Индигиир уокуругуттан Ил Түмэн дьокутаата, СӨ үтүөлээх бырааһа, мэдиссиинэ наукатын доктора, үрдүк категориялаах офтальмолог быраас  Любовь Явловская санаатын бу курдук үллэһиннэ:

Балыыһа материальнай-тиэхиньиичэскэй  баазатын тупсарыыга кылаабынай быраас үрдүкү салалтаҕа бэйэтин тылын тиэрдэриттэн, кини аптарытыатыттан улахан тутулуктаах. Халыма-Индигиир уокуругун улуустарын балыыһалара да, анал автопааркаларыгар көлөлөрө да олус эргэрдилэр. Өймөкөөн улууһун киин балыыһатын кылаабынай бырааһа Ираида Харлампьева быйыл үгүс үлэни ыытта, балыыһатын тас өттө хапытаалынай өрөмүөнү ааста.

Аны бу күннэргэ улуус киин балыыһата ОСМП суһал көмө массыынатынан  хааччылынна.

Онон бастыҥ үлэлээх кылаабынай быраас Ираида Харлампьева төрөөбүт дойдутун — Тымныы полюһун киин балыыһата материальнай баазата тупсуутугар, каадырдарынан хааччыллыытыгар сыратын, болҕомтотун өссө да уура турарыгар эрэнэбин.

Ити курдук, көстөр уустуктарга бэринэн хаалбакка, бары кыаҕы туһанан, тирээн турар кыһалҕаны кэмиттэн кэмигэр быһааран иһиини Өймөкөөн улууһун киин балыыһатын кылаабынай бырааһа Ираида Харлампьева холобуругар көрөбүт.

 

Елена ПОТОЦКАЯ, «Саха сирэ» хаһыат, edersaas.ru

Хаартыскалары Ираида Харлампьева тиксэрдэ уонна ааптар түһэриитэ.

0
0
Telegram @edersaas20