Быйыл Өймөкөөн улууһа төрүттэммитэ 100 сыллаах үбүлүөйүн бэлиэтиир.
edersaas.ru
Урукку сылларга өрөспүүбүлүкэ атын улуустарын курдук, Өймөкөөн улууһа үбүлүөйдээх сыла 1930 сылынан ааҕыллар этэ. Онтон кыраайы үөрэтээччи, улуус Бочуоттаах гражданина Тамара Васильева улуус туһунан кинигэ суруйаары, архыыпка үлэлэһэ сылдьан, оройуон устуоруйатыгар сыһыаннаах бэрт суолталаах докумуону булан ылбыта. Ол докумуоҥҥа олоҕуран, улуус уопсастыбаннаһа өрөспүүбүлүкэ салалтатыгар Өймөкөөн улууһун төрүттэммит сылын 1920 сылтан ааҕарга туруорсуутун, Ил Дархан ылыммыта.
1904 сыллаах төрүөх Семен Винокуров бэйэтин күннүгэр: «1920 сыл от ыйын 18 күнүгэр Өймөкөөн улууһа Байаҕантай улууһуттан арахсан, туспа улуус буолбутун туһунан үөрүүлээх уураах кэлбитэ. Улуус киинэ II Бороҕоҥҥо быраабаламмыта», — диэн суруйар. Архыып бу уонна да атын суолталаах докумуоннарыгар олоҕуран, от ыйын 18 күнэ Өймөкөөн улууһун 100 сыллаах үбүлүөйэ бэлиэтэнэр күнүнэн ааҕыллар. Бу туһунан кыраайы үөрэтээччи Тамара Васильева «Түҥнэстибэт төлкөлөөх, өлбөөдүйбэт Өймөкөөнүм» диэн кинигэтигэр суруйбута.
Улуус 100 сыллаах үбүлүөйүн көрсө дириҥ ис хоһоонноох үлэ ыытылла турар. Хомойуох иһин, үбүлүөйдээх сыл бары тэрээһиннэрэ сыстыганнаах дьаҥ өрө туран, тохтотуллан, куйаар ситимин нөҥүө ыытыллар.
Бу күннэргэ Өймөкөөн улууһугар коронавирус дьаҥа тарҕанар куттала баарынан сибээстээн, оройуон дьаһалтатын баһылыга Иннокентий Сивцев бэс ыйын 8 күнүнээҕи 280 №-дээх дьаһалынан быйыл Томтор нэһилиэгэр ыытыллыахтаах Өймөкөөн улууһун 100 сыллаах үбүлүөйүгэр анаммыт улуустааҕы Ыһыаҕы тохтотто.
Дьаһалга нэһилиэктэр баһылыктарыгар бэйэлэрин сирдэригэр-уоттарыгар ыыталлара былааннаммыт ыһыахтары эмиэ тохтотоллоругар сорудахтанна.
Бары үбүлүөйдээх тэрээһиннэр аны күһүн балаҕан ыйыгар көстүлэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.