Маны аах Уопсастыба

Өймөкөөн улууһугар — юридическай десант

Бу күннэргэ улуус нэһилиэктэринэн исписэлиистэр юридическай десаннара үлэлээтэ. Ол курдук, дьаһалта үлэһиттэрэ Төрүккэ, Сордоҥнооххо, Үчүгэйгэ, Өймөкөөҥҥө, Томторго сылдьан, дьону кытта көрүстүлэр, кыһалҕалаах боппуруостарыгар сүбэ-ама биэрдилэр.

Коронавирус сыстыганнаах дьаҥынан сибээстээн, гражданнары кытта биирдиилээн көрсүһүү дьаһалтаҕа суруттарыы бэрээдэгинэн ыытылынна. Улуус муниципалитетын баһылыга Иннокентий Сивцев салайар бөлөҕөр бас билэр баай-дуол уонна сир сыһыаннаһыытын управлениетын салайааччы, дьаһалта, тыа хаһаайыстыбатын, улуустааҕы киин балыыһа, инфраструктура сайдыытын сулууспатын юристара бааллар.

Улуус баһылыга нэһилиэктэр бары эбийиэктэрин, тэрилтэлэрин үлэлэрин кытта билсэн баран, кэккэ дьаһалы ылла.

«Коронавирус сыстыганнаах дьаҥын кэмигэр үгүс киһи улуус киинигэр дьыалатын-куолутун кэмигэр быһаартарбакка, кыһалҕата аччыахтааҕар уһаан-кэҥээн хаалар. Онон анал юрист идэлээх дьон сүбэ-ама биэрэн, дьон ыйытыыларыгар хоруйдары ыла астыннылар», — диэн бэлиэтээтэ Иннокентий Семёнович.

Биллэн турар, бу маннык сырыы салалтаны уонна нэһилиэнньэ сомоҕолуур, баар уустуктары, ыарахаттары кэмигэр быһаарарга суолталаах олугунан буолар.

Елена ПОТОЦКАЯ, «Саха сирэ» хаһыат, edersaas.ru

0
0