От ыйын 27 күнүнээҕи туругунан, Өймөкөөн улууһугар икки ойуур баһаара баара бэлиэтэнэр.
Ол курдук, улуус баһылыгын э.т. Светлана Данилевич иһитиннрбитинэн, «ландшафтнай» дэнэр баһаар Аартык бөһүөлэгиттэн 40 км -тан тахса ыраах сиргэ баар. Бу сири уу тулалыыр буолан, миэстэтигэр тиийэр олус уустук. Баһаары умулларыыга салайааччынан улуустааҕы ыксаллаах быһыы-майгы отделын кылаабынай испсэлииһэ Федор Сивцев ананна. Баһаары умулларыыга улуустааҕы 27 №-дээх баһаарынай сулууспа, СӨ ЫБМ аэромобильнай бөлөҕө, «Магаданэнерго» ПАО ЗЭС, «Горнай Автодор» АУо, 132 №-дээх ДЭП ХЭУо ыарахан уйуктаах тиэхиньикэлэрэ уонна үлэһиттэрэ үлэлииллэр.
Маны таһынан, Биэрэк Үрдүттэн 50 км ыраах, Уус Ньараттан 11 км тэйиччи Березовое сиргэ ойуур баһаара баара биллэр. Өймөкөөн улууһугар буола турар баһаардары 1-кы кылаастаах ойуур баһаарынан биллэрдилэр.
Елена ПОТОЦКАЯ, «Саха сирэ» хаһыат.