Бүгүн, бэс ыйын 28 күнүгэр, Өймөкөөн улууһа төрүттэммитэ 101 сылын бэлиэтиир.
1920 сыллаахха бу күн Саха сирин Райревкомун мунньаҕын 17 №-дээх боротокуолугар Өймөкөөнү Байаҕантай улууһуттан арааран, Бороҕон уонна Өймөкөөн — икки нэһилиэктээх Өймөкөөн буолаһын тэрийэр туһунан сурукка киирбитэ. Мунньах бэрэссэдээтэлэ Максим Аммосов этэ. Бу кэмтэн ыла Өймөкөөн оройуонун устуоруйата туспа көмүс буукубанан суруллан барбыта. Онтон ааспыт үйэ 30-с сылларыгар оройуоннааһын саҕаланан, 2020 сыллааҕы устуоруйа чахчыта сотулла сыыспыта. Хата ону, улуус кыраайы үөрэтээччилэрэ хасыһан, докумуонунан дакаастаан, Өймөкөөн улууһун тэриллибит күнэ-дьыла чопчуламмыта.
Улууска 30-с сыллартан көмүс хостооһуна, холкуостар тэриллиилэрэ, онтон бөдөҥсүтүү саҕаланан, сопхуостарга көһүү буолбута. Онтон уларыта тутуу уустук кэмнэригэр көмүс хостуур бириискэлэр эстиилэрэ, кэлиҥҥи сылларга улууска туризм сайдыыта түстэниитэ — бу барыта 101 сыл устата буолбут бөдөҥ уларыйыылар, сайдыы тосхолун түстээһин. Өймөкөөн улууһа — араас омук тоҕуоруһан олорор түөлбэтэ «Бүгүҥҥү Өймөкөөн бырамыысыланнаһынан, тыа хаһаайыстыбатынан уонна туризмынан сайдар инникилээх, сарсыҥҥылаах кэскили түстүүр өрөспүүбүлүкэ биир бөдөҥ улууһа.
Эһигини, күндү биир дойдулаахтарым, төрөөбүт Өймөкөөммүт 101 сылынан итиитик- истиҥник эҕэрдэлиибин! Эһиэхэ кытаанах доруобуйаны, сарсыҥҥыга эрэллээх буолууну баҕарабын. Санаабыккыт барыта кэмигэр туолан истин!» — диэн «Өймөкөөн улууһа (оройуона)» МТ баһылыга Иннокентий Сивцев бэйэтин эҕэрдэтин социальнай ситимнэр нөҥүө тиэртэ.
Елена ПОТОЦКАЯ, «Саха сирэ» хаһыат, edersaas.ru