Бу күннэргэ Өймөкөөн улууһун баһылыга Иннокентий Сивцев киин куоракка командировкаҕа сылдьан, Олоҥхо ыһыаҕар сыһыаннаах боппуруостарга өрөспүүбүлүкэ министиэристибэлэрин уонна биэдэмистибэлэрин эппиэттээх салайааччыларын кытта көрүстэ.
Олоҥхо ыһыаҕар бэлэмнэнии чэрчитинэн СӨ Бырабыыталыстыбатын Бэрэссэдээтэлин солбуйааччы Сергей Местниковы, СӨИл Түмэн Бэрэссэдээтэлин бастакы солбуйааччы Александр Жиркову кытта биирдиилээн көрсөн, эһиил Өймөкөөҥҥө ыытыллар Олоҥхо ыһыаҕар бэлэмнэнии туһунан кэпсэттэ.
Федеральнай нолуок сулууспатын Саха сиринээҕи салаатын салайааччытын э.т. Владимир Софроновы кытта оройуоҥҥа нолуок киириитин дьүүллэстэ. Көрсүһүүгэ улуустааҕы үп управлениетын салайааччытын э.т. Елена Сапегина, улуустааҕы дьаһалта экэниэмика управлениетын салайааччыта Саргылана Алексеева уонна улуус баһылыгын бэрэстэбиитэлэ Никифор Протопопов кыттыыны ыллылар.
СӨ Үп министиирин солбуйааччыта Надежда Филиппованы кытта улуус бүддьүөтүгэр сыһыаннаах боппуруостары ырытта.
«Сахаэнерго» АУо генеральнай дириэктэрэ Гаврил Алексеевы кытта көрсөн, ыһыах ыытыллар түһүлгэтин электричество уотунан хааччыйыы боппуруостарын ырыттылар,
«Водоканал» АУо генеральнай дириэктэрэ Анатолий Кырджагасовы кытта иһэр ыраас уунан хааччыйыы боппуруһун тула кэпсэтии барда.
Биллэн турар, Олоҥхо ыһыаҕар тирээн турар туһааннаах боппуростары билиҥҥиттэн быһаардахха табыллар. Бу нэдиэлэ бүтэһигэр улуус баһылыга Иннокентий Сивцев киин куоракка туруорсубут боппуруостарын тыа сирин нэһилиэктэрин кэрийэ сылдьан билиһиннэриэҕэ, дьон-сэргэ санаатын истиэҕэ, бэлэмнэнии үлэтин былаанын торумнуур үлэни тэрийиэҕэ
От ыйын 21 күнүгэр Дьокуускайга Ил Дархан Айсен Николаев салайааччылаах Өймөкөөн улууһугар Олоҥхо ыһыаҕын тэрийэр кэмитиэт тэрээһин мунньаҕа буолуоҕа.
Елена ПОТОЦКАЯ, «Саха сирэ» хаһыат.
Хаартыскалары Иннокентий Сивцев тиксэриилэрэ.