Айылҕа харыстабыла Сүрүн

Өймөкөөн улууһа ойуур баһаарыгар атырдьах ыйыттан бэлэмнэнэр

Ахсынньы 27 күнүгэр Ил Дархан Айсен Николаев олохтоох салайыныы Сэбиэтин мунньаҕын ыытта.

Ааһан эрэр сылы түмүктүүр мунньах туһунан «Өймөкөөн улууһа (оройуона)» МТ баһылыга Иннокентий Сивцев санаатын бу курдук үллэһиннэ:

Ааспыт сайын Өймөкөөҥҥө айылҕа иэдээнин – бэс ыйыгар саҕаламмыт ойуур баһаарын от ыйын ортотугар курулас ардах хонуктуу  кэлэн умуруорбута. Ордук Төрүт уонна Өймөкөөн нэһилиэктэригэр улахан уот туран, нэһилиэктэргэ киирэр куттала үөскээбитигэр олохтоохтор икки ыйы быһа ойуур баһаарын кытта охсусупуттара. Атырдьах ыйын саҥатыгар оройуон салалтата ыраах сирдэргэ туһанарга анал тиэхиньикэнэн, баһаарга туттуллар тэрилинэн хааччынарга быһаарыы ылыммыта.  Ыытыллыбыт тэрээһин үлэ түмүгэр улууспутугар спутниковай төлөпүөннэринэн, дроннарынан, GPS-навигаторынан, уоттан харыстанар анал көстүүмнэринэн, атах таҥаһынан, уматыгынан үлэлиир эрбиинэн уонна да атын наадалаах тэриллэринэн хааччыммыппыт.

Маныаха улахан өйөбүлү Sinet Spark  пуондата (сал. Арсен Томскай) оҥорбута. Улууспутун кинилэр квадрокоптерынан, араадьыйа ыстаансыйатынан, уу кутар ранеһынан, күрдьэҕинэн, спутник төлөпүөнүнэн уо.д.а. туһалаах тэриллэринэн хааччыйбыттара. Биллэн турар, бу — ыраах тайаан сиргэ баһаар кээмэйин, умайа  сытар сир ханан баарын билэргэ олус туһалаах тэриллэр.

Өймөкөөн улууһун олохтоохторо барҕа махталбытын «Майтона» ХЭУо салалтатыгар тиэрдэбит. Тэрилтэ улууска 2.8 мөл. солк. суумалаах булууктаах “Беларус” 952.3 тыраахтары  көмөҕө утары ууммута. Үгүс биир дойдулаахтарбыт-өймөкөөннөр, блогердар бэйэлэрин баҕаларынан үгүс көмөнү, өйөбүлү оҥорбуттара.

Ил Дархан Айсен Николаев олохтоох салайыныы Сэбиэтин мунньаҕар 2022 сылга муниципальнай тэриллиилэр нэһилиэнньэлээх пууннары ойуур баһаарыттан көмүскүүргэ, ыксаллаах быһыы-майгы содулларын туоратарга уонна сэрэтэр резервнэй пуондалары тэрийиигэ ураты болҕомтону уурарга сорудахтаата.

Өймөкөөн оройуонун муниципалитета өссө атырдьах ыйыгар саҕалаабыт ыксаллаах быһыыны-майгыны туоратыыга туһуламмыт тэрийэр үлэни салгыы ыытар: үгүс кэскиллээх былаан дьүүллэһиигэ, быһаарыыга сылдьар.

 

Елена ПОТОЦКАЯ, «Саха сирэ» хаһыат. 

Хаартыска — Иннокентий Сивцев тиксэриитэ.

 

0
0
Telegram @edersaas20