2000 сыллаахха СӨ Урбаан уонна туризм дьыалаларын министиэристибэтин өйөбүлүнэн Өймөкөөн улууһун муниципалитета аан бастаан «Тымныы полюһа — Өймөкөөн» диэн кыһыҥҥы туризм бэстибээлин тэрийбитэ.
Өрөспүүбүлүкэтээҕи таһымнаах бастакы тэрээһин буолан, дьон санаата кэлбитин, сүргэтэ көтөҕүллүбүтүн, санаата кынаттаммытын, Өймөкөөн улууһун үгүс олохтооҕо күн бүгүҥҥэ диэри өйдүүр. Бу тэрээһини баҕа санаа гынан иитиэхтии сылдьыбытын, оччолорго Томтор нэһилиэгин баһылыга Спиридон Слепцов олоххо киллэрбитэ. Кини кылгас олоҕун бу биир суолталаах тэрээһин үйэтиппитэ.
Үбүлүөйдээх тэрээһин былырыын бэлиэтэниэхтээх этэ да, сыстыганнаах дьаҥынан сибээстээн, бары тэрээһиннэр тохтотуллубуттара. Быйыл тэрийээччилэр биир сабыылаах сиргэ дьону мунньубат инниттэн Алыһардаах диэн Томтортон 20 км тэйиччи баар күөлгэ кыһыҥҥы туризм бэстибээлин тэрийдилэр. Тэрээһиҥҥэ барытыгар олохтоох норуодунай тыйаатыр артыыстара, нэһилиэктэрдээҕи үҥкүү кэлэктииптэрэ, Өймөкөөн ырыаһыттара кыттыыны ыллылар.
Оҕолорго бэртээхэй сынньанар аттракционнар ыытылыннылар, сувенир быыстапкатын арааһа тардылынна.
15 бураан күөл устун күрэстэстэ, Үчүгэй нэһилиэгин табаһыттара кыттан, бырааһынньыгы киэргэттилэр. 20 сыл устата өймөкөөннөр тымныыны пропагандалаан, Чысхааннарын инники күөҥҥэ тутан, Саха сирин брендэ оҥордулар. Өймөкөөн тымныы полюһун ааттаан 70-тан тахса омук дойдутуттан кэлэн бардылар, отучча киинэ, тэлэбиидэнньэ хампаанньата Өймөкөөн улууһун олохтоохторо тыйыс усулуобуйаҕа олороллорун уһуллулар. Араас омук Тымныы оҕонньотторо кэлэн, Өймөкөөҥҥө орох тэптилэр. Кыһыҥҥы туризм бэстибээлэ 2018 сыллаахха «Хрустальный компас» Бүтүн Арассыыйатааҕы куонкуруска «Эригийиэн бастыҥ бырайыага» номинацияҕа бастаан, кыайыылааҕынан буолбута. Онон 20 сыллаах үбүлүөйүн бу суолталаах тэрээһин дириҥ силистэнэн-мутуктанан көрүстэ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскалара.