Быйыл Өймөкөөн улууһугар күн-дьыл туран биэрэн, үгүс хаһаайыстыбалар сыл тахсар отторун булуннулар.
Томтор нэһилиэгэ окко быйылгы былаанын 70-тан тахса бырыһыан толордо. Бу туһунан олохтоох дьаһалта баһылыга Алексей Винокуров маннык кэпсиир:
— Нэһилиэк олохтоохторо 2000-тан тахса сылгыны иитэллэр. Онон сайыҥҥы кэмҥэ оттооһуҥҥа улахан болҕомтобутун уурабыт. «Тоноор» (сал. Николай Винокуров ), «Өймөкөөн» ХЭУо (сал. Мирон Егоров ), «Силис» (сал. Петр Протопопов ) сылгыны үөрдээн иитэр үс хаһаайыстыба уонна Василий Сивцев, Тарас Дягилев салайар икки бааһынай хааһыйыстыбалара быйылгы оттооһуҥҥа тахсыылаахтык үлэлээтилэр. Улуус сылгытын ахсаана сүрүннээн бу биэс хаһаайыстыбаттан турар буолан, хаһаайыстыбалар салайааччыларын кытта эрдэ көрсөн сүбэлэспиппит, үлэ хаамыытын торумнаабыппыт.
Бу күннэргэ хаһаайыстыбалар кыстыыр отторун булунан олороллор. «Тоноор» икки биригээдэтиттэн биирэ отуттан тахса кэбиһии оттоох. Иккис биригээдэ төһө да былаанын толордор, сайын үтүөтүн баттаһан, өссө да оттуу сылдьар.
Быйылгы оттооһуҥҥа олохтоох ыччаттары түмэ тартыбыт. Устудьуоннары кытта улахан кылаас оҕолоро от үлэтигэр күүстээхтик үлэлээтилэр. Биһиги улууспутугар киин улуустар курдук ходуһабытыгар тиэхиньикэ сылдьыбат. Онон илии ыарахан үлэтин уолаттар тулуппатылар, кимиилээхтик үлэлээтилэр. Ол курдук, «Тоноор» хаһаайыстыба икки биригээдэнэн 14 ыччаты оттотто. Онон устудьуоннар күһүн үөрэнэ баралларыгар хамнастанан, куоракка өттүк харалаах баран эрэллэр. Мирон Егоров «Өймөкөөн» хаһаайыстыбатыгар 12 оҕону оттотто. «Силис» хаһаайыстыба салайааччыта Петр Протопопов эмиэ уонча ыччаты от кытаанах үлэтигэр уһуйда. Атын хаһаайыстыбаларга ыччаттар эмиэ тахсыылаахтык үлэлээтилэр.
Күн-дьыл туран биэрэн, улуус хаһаайыстыбалара быйылгы курдук өлгөмнүк сыта-тура оттооботохторо быданнаата. Онон Ийэ Айылҕаларыгар өймөкөөннөр махталлара муҥура суох.
Елена ПОТОЦКАЯ, «Саха сирэ» хаһыат