Соторутааҕыта улуус баһылыга Иннокентий Сивцев Дьокуускай куоракка командировкаҕа сылдьан «Водоканал» АУо генеральнай дириэктэрэ Анатолий Кырджагасовы кытта көрсүбүтэ.
Өрүттэр онно Томторго Буор Үрэхтэн Олоҥхо Ыһыаҕа буолар сиригэр «Көмүс күрүөҕэ» диэри уу турбатын тардар туһунан кэпсэппиттэрэ. Ол кэпсэтии түмүгүнэн Олоҥхо Ыһыаҕар бэлэмнэнии чэрчитинэн «Водоканал» АУо исписэлиистэрэ Томтор нэһилиэгэр кэлэн, уу турбата барар сирин бырайыагын оҥорууга үлэлэстилэр.
Акционернай тэрилтэ хапытаалынай тутууга управлениетын кылаабынай инженерэ Любовь Яковлева, өрөмүөнү ыытар уонна эбийиэги саҥардыыга тиэхиньиичэскэй инженер Андрей Коновалов, бырайыактыыр инженер Татьяна Степанова үлэ кээмэйин үөрэттилэр.
— Исписэлиистэр бырайыак хас да арааһын оҥоруохтара. Ол онтон биирдэригэр биһиги этиибит учуоттаныаҕа. Уу турбатын биирдэ эрэ туттарга буолбакка, Олоҥхо Ыһыаҕын кэнниттэн эмиэ туттар гына суол тыраассатынан ыытарга кэпсэттибит. Оччотугар нэһилиэккэ ити уу турбата көдьүүстээх туһаны аҕалыаҕа, — диэн улуус баһылыга бэлиэтээтэ.
Иннокентий Сивцевы кытта муниципалитет баһылыгын тыа сиригэр бэрэстэбиитэлэ Никифор Протопопов, Томтор нэһилиэгин баһылыга Алексей Винокуров сырыттылар.
Елена ПОТОЦКАЯ, «Саха сирэ» хаһыат.