Өймөкөөн улууһун биир саамай эрэйдээх суоллаах-иистээх Төрүт нэһилиэгэр олох күөстүү оргуйар.
edersaas.ru
Нэһилиэк Индигиир уонна Элги — улуус икки улахан өрүһүн икки ардыгар турар буолан, сайыҥҥы кэмҥэ айан-сырыы суох. Оҥочонон эрэ сылдьаҕын. Онон 400-чэ нэһилиэнньэлээх Төрүт нэһилиэгэ сүрүн тэрээһиннэрин кыһыҥҥы суол баарына тэрийэр. Буолаары буолан, ньиргиэрдээрдик. Өйтөн-санааттан сүппэттик. Биир оннук өрөспүүбүлүкэтээҕи таһымнаах тэрээһин соторутааҕыта буолан ааспытын туһунан уопсастыбаннай кэрэспэндьиэн Елена Черемкина кэпсиир:
— Улуус кииниттэн уонна бары нэһиликтэриттэн, ону тэҥэ Горнай улууһун Маҕараһыттан 16 хамаанда кыттыылаах, Төрүт нэһилиэгин баһылыга Семен Босиков бирииһигэр бэрт эрийсиилээх волейболга күрэхтэһии буолан ааста.
Киирсиилээх күрэхтэһии үгэс быһыытынан быйыл үгүс төгүлүн ыытылынна. Күрэхтэһиини тэрийсии, суудьуйалааһын, култуурунай бырагыраама, спортсменнары хонноруу уонна аһатыы курдук эппиэттээх боппуруостары Мария Николаева салайааччылаах орто оскуола кэлэктиибэ быһаарда.
Быйыл Горнайтан күүстээх хамаанда кэлэн, күрэх таһыма үрдээн, сытыы киирсиилэри көрдүбүт. Дьахталларга биир да хотторуута суох Томтор нэһилиэгин хамаандата эрэллээхтик бастаата. 2-с миэстэ – Уус-Ньара, 3-с миэстэ – Төрүт буоллулар.
Эр дьоҥҥо 11 командаттан финалга Ньара уонна Үчүгэй күүстээх хамаандалара туораан хомойдулар. 3-с миэстэҕэ кыл-мүччү ыалдьыттарбыт — Горнайтан «Одуну» хамаандата таҕыста. 2-с миэстэҕэ Сордоҥноох баһылыга Иван Максимов салайааччылаах Сордоҥноох нэһилиэгин хамаандата таҕыста. 1-кы миэстэни ылан, Кубок хаһаайынынан Төрүт хамаандата бэркэ сыралаһан буолла.
Төрүт волейболистара улуус сборнайыгар сылдьан, Тымныы полюһа — Өймөкөөн чиэһин өрүү көмүскүүллэр. Кыайыы олуга 2006 -2008 сс. ууруллубута. Оччолорго волейбол күрэхтэһиитин энтузиастара Григорий Кондаков уонна Семен Атласов оскуола оҕолорун, улахан дьону кытта тэҥҥэ эрчийэн, кыайыыга кынаттаан, бүгүҥҥү үрдүк кыайыы ситиһилиннэ. Номнуо бэлэмнээх Төрүт аныгы кэмин ыччатын Евгений Прокопьев уонна Василий Ануфриев сыралаһан эрчийбиттэрэ. Билигин оскуола иһинэн оҕолору спортка үрдүк категориялаах бэтэрээн-учуутал Павел Атласов уонна волейболга тренер Елена Слепцова уһуйаллар.
Икки күннээх тыҥааһыннах күрэхтэһии кыраһыабай оонньуулары бэлэхтээтэ, дьон сүргэтин көтөхтө. Тэрээһин спонсордарынан олохтоох урбаанньыттар Иван Десяткин, Изабелла Кондакова уонна Альберт Неустроев, «Ситим» ыччат түмсүүтэ, оскуола профкома, 11 кылаас төрөппүттэрэ, кулууп, нэһилиэк дьаһалтата буоллулар.
Төрүккэ волейбол сайдыытыгар улахан кылааттарын биэрбит, күрэхтэһиилэргэ өрүү инники күөҥҥэ сылдьыбыт, билигин биһиги кэккэбитигэр суох уолаттар: Павел Слепцов, Евгений Неустроев, Евгений Прокопьев аймахтара кинилэр ааттарын үйэтитэн, спорт бэтэрээннэригэр бэйэлэрин бириистэрин туруордулар.
Уопсайынан, Төрүт — улуус кыра эрээри, бэрт кыахтаах нэһилиэгэ. Ол курдук, өрөспүүбүлүкэҕэ биллэр ааттаах-суоллаах дьон мантан төрүттээхтэр. Былыр былыргыттан Төрүт спортивнай нэһилиэгинэн биллэр. Ол да иһин буолуо, бүгүҥҥү күҥҥэ ыччаттарбыт инники күөҥҥэ сылдьаллар. Тустууга Рустам Машарипов, сүүрүүгэ Дамир Чачуа, атах оонньуутугар Темур Чачуа, хапсаҕайга Александр Жирков ааттара өрөспүүбүлүкэҕэ дорҕоонноохтук ааттаналлар. Бүтэһик Манчаары оонньуутугар Анна Стручкова куобахха хотугу зонаҕа 2-с миэстэ буолбута.
Ити курдук, Дойдуга бэриниилээх буолуу сылыгар Өймөкөөн улууһун спортсменнара кимиилээхтик киирсэн, өрөспүүбүлүкэтээҕи волейбол күрэхтэһиитигэр төрөөбүт Төрүттэрин инники күөҥҥэ таһаардылар.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.