Өймөкөөн  Төрүтүттэн Тааттаҕа — икки куул бэлэх (ВИДЕО)

Ааптар: 
Бөлөххө киир:

Саха сирин меценат-атыыһыта Н.О.Кривошапкин төрөөбүтэ быйыл 185 сылынан сибээстээн, Өймөкөөн улууһугар Үтүө дьыала сыла биллэриллибитэ.

Ньукулай Кырбаһааҥкын төрөөбүт нэһилиэгин Төрүт (Тарын-Үрэх) олохтоохторо «185 үтүө дьыаланы оҥоруохха!» диэн биир дойдулаахтарыгар ыҥырыы таһаарбыттара. Бу ыҥырыыларын олоххо киллэрэн, төрүттэр сыл саҥатыттан үс ый устата бэрт элбэх суолталаах бачыымы олоххо киллэрэн, көлүөнэлэринэн үтүө дьыаланы араас хайысханан оҥорон эрэллэр.

Бүгүн «Өймөкөөн» НКО бырабылыанньатын салайааччы Рустам Кривошапкин уонна бу уопсастыбаннай тэрилтэ актыбыыһа Фаина Румянцева Арассыыйатааҕы таһымнаах документальнай киинэ уһуллуутугар Ааллаах Үүн таһаҕасчыттарын кыһыҥҥы таҥастарын тигэ сылдьар норуот маастара, Таатта улууһун Туора Күөл нэһилиэгин олохтооҕо Изабелла Эляковаҕа Төрүт нэһилиэгин уопсастыбанньыктара хомуйбут түүлээхтэрин уонна тыстарын, таба тириитин — икки куул иискэ туттуллар түүлээҕи Таатта улууһун Норуот айымньытын дьиэтин дириэктэрин солбуйааччы, “Оһуордаах Таатта” айар мастарыскыай салайааччытыгар Марианна Степановаҕа туттардылар.

Норуот маастара Изабелла Элякова Сунтаар улууһугар ыытыллыбыт “Тоҕус оһуордаах түһүлгэ” иистэнньэҥнэр өрөспүүбүлүкэтээҕи куонкурустарыгар кыттан, 1-кы бириистээх миэстэни ылла. Онон Тымныы полюһун Төрүт нэһилиэгиттэн кэлбит дьоһуннаах бэлэҕи тутаат, Таатта аатырбыт иистэнньэҥэ Изабелла Элякова ииһэ эбии тэтимирдин уонна табылыннын, саҥа саҥаттан айар сүүрээнэ тобуллан истин”, — диэн Рустам Кривошапкин икки куул түүлээх бэлэҕи туттара туран, алгыһын тиэртэ.

Ити курдук, биир дойдулаахтарбыт Төрүт нэһилиэгин олохтоохторо оҥорбут үтүө дьыалаларын атыттар эмиэ оҥордуннар диэн өрөспүүбүлүкэ уопсастыбанньыктарын ыҥырабыт уонна норуот маастара Изабелла Эляковаҕа иистэнэригэр ким туох кыахтааҕынан араас түүлээҕи хомуйан ыытаргытыгар көрдөһөбүт, — диэн санаатын тиэртэ «Өймөкөөн» кэммиэрчэскэйэ суох тэрилтэтин бырабылыанньатын актыбыыһа Фаина Румянцева.

Сунтаарга айаннаары олорон «Өймөкөөн улууһун Төрүт нэһилиэгин олохтоохторо былырыын социальнай ситимнэргэ ыҥырыы таһаарааппын кытта биир куул куобах тириитэ хомуйан ыыппыттара. Ону бу улахан ииспэр бэркэ туһаммытым. Соторутааҕыта “таба тириитин уонна тыһын, куобах тириитин мунньан ыыттыбыт” диэн бу үлэни сүрүннээччи Розалия Атласова биллэрбитэ. Онон Төрүт нэһилиэгин уопсастыбанньыктарыгар иккис сылын суолталаах өйөбүллэрин иһин истиҥ махталбын тиэрдэбин«, — диэн Изабелла Элякова санаатын төлөпүөнүнэн кэпсэтиигэ эппитэ.

Өймөкөөн улууһун Төрүт нэһилиэгин уопсастыбанньыктарын бачыымнарын өйөөн, үтүө дьыалаҕа кыттыһыаҕыҥ, доҕоттор!

Елена ПОТОЦКАЯ, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0