Бу күннэргэ өрөспүүбүлүкэҕэ коронавирус турар куттала суоһаан, нэһилиэнньэҕэ харыстаныы, сэрэтии үлэтэ күүскэ ыытыллар.
edersaas.ru
Кэрэхсэбиллээҕэ баар, ыччат араас аахсыйа ыытан, биир дойдулаахтарыгар өйөбүл оҥороллор. Ол курдук, аҕыйах чаас анараа өттүгэр Өймөкөөн улууһун Төрүт нэһилиэгин ыччаттарын «Ситим» түмсүүтүн лиидэрэ Сахаайа Григорьева «Төрүт кэскилэ» батсаап бөлөҕөр бэрт интэриэһинэй бачыым оҥоһуллан эрэрин сырдатта:
— Биһиги «Олохтоох нэһилиэнньэҕэ — вирустан утары көмүскэл мааска» диэн аахсыйаҕа кыттыһан, бэйэбит мааска тигэн, ытык кырдьаҕастарбытыгар, тыыл бэтэрээннэригэр түҥэтиэхпит. Ким баҕалаах биһиэхэ кыттыһыҥ. Оччотугар нэһилиэкпит дьонун барыларын маасканан хааччыйыа этибит.
Мин бу суругу ааҕаат, Сахаайаҕа эрийэ сырыттым. Ыччат лиидэрэ дьүөгэтинээн Елена Слепцовалыын иистэнэ олорор эбиттэр.
—«Ситим» түмсүүбүт — кэммиэрчэскэйэ суох тэрилтэ. Быйыл үлэбитин сөргүтэн, араас хайысхалаах үлэни тэрийэбит. Мааска аахсыйатын Горнай улууһун Маҕарас ыччаттарын инстаграмыттан көрөн, аахсыйаҕа кыттыһан, кырдьаҕастарбытын маасканан хааччыйарга сананныбыт.
—Кинилэр таһырдьа тахсалларыгар харыстаныа этилэр. Бэйэлэрэ тиктэр кыахтара суох. Онон биһиги көмөбүт кинилэргэ билигин олус наада, — диэн санаатын үллэстэр Сахаайа.
Үтүө дьыала батыһыннарыылааҕа үчүгэйин! Маҕарас эдэр учууталларын бачыымнарын ыраах Тымныы Полюһун ыччаттара иилэ хабан ыллылар. Ити курдук, маннык уустук кэмҥэ бэйэ-бэйэҕэ көмөлөһөн, бэйэ-бэйэни өйөһөн сырыттахпытына сатанар. Онон ыччаттарбыт ханна олороллоруттан тутулуга суох, бэйэ-бэйэлэриттэн үөрэнэн, уопут атастаһан, төрөөбүт түөлбэлэригэр үтүө дьыала оҥороллор. Быйыл Өймөкөөн улууһа 100 сыллаах үбүлүөйүн бэлиэтиир. Онно «100 үтүө дьыала» хамсааһын биллэриллибитэ. Ийэ дойдуга бэриниилээх буолуу сылыгар Төрүт нэһилиэгин ыччаттара араас хайсхалаах үлэни ыытан, биир дойдулаахтарын махталларын ылан эрэллэр. Дьахтар күнүгэр Төрүт дьахталлара бураан сүүрдэн, мас хайытан, кулуһун оттон куоталаспыттарын туһунан суруйан турабын. Сахаайа Григорьева бураанынан сүүрдүүгэ тэҥнээҕин булбатаҕа.
Онон Төрүт ыччаттара муҥутуур ыксаллаах балаһыанньаҕа бэйэлэрин биир дойдулаахтарыгар өйөбүл буолаллара хайҕаллаах суол.
Елена ПОТОЦКАЯ, «Саха сирэ» хаһыат, edersaas.ru
Хаартыска: социальнай ситимнэртэн.