Өймөкөөн Төрүтүгэр нэһилиэккэ ойуур баһаарын чугаһатымаары туруулаһаллар
Атырдьах ыйын 2-3 күннэригэр Өймөкөөн улууһугар IV кылаастаах ойуур баһаара туруон сөбүн туһунан сэрэтии улуус социальнай ситимнэринэн тарҕанна.
edersaas.ru
Суолталаах сэрэтии докумуоҥҥа гидрометеорология уонна тулалыыр эйгэ салайааччытын солбуйааччы Татьяна Маршалик илии баттаабыт. Ойуур баһаара Сордоҥноох уонна Төрүт нэһилиэктэригэр турбута хаһыс да хонуга.
Олохтоохтор бэйэлэрэ субуотунньуктаан умуруора сатыыларын туһунан Төрүт нэһилиэгин баһылыгын э.т. Владимир Алексеев бу курдук кэпсиир:
— Көрдүгээннээбит ойуур баһаара нэһилиэк чугаһыгар турбутун истээт, алта киһи от ыйын 26 күнүгэр тиийэн умуруора сатаабыппыт да кыайбатахпыт.
Сарсыныгар мин «Западная» көмүс хостуур тэрилтэ Бадарааннааҕы учаастагыттан көмөлөһөллөрүгэр көрдөспүтүм. Төһө да көмүс сууйуутун үгэнэ буоллар, тылбын быһа гыммакка, алта киһини көмөҕө ыыппыттара. Үөскээбит балаһынньаны улуустааҕы дьаһалта баһылыгын солбуйааччы Николай Глазковка биллэрэн, оройуоннааҕы лестничествоттан уу кутар суумканы уларсан ыыттылар. Онон илии тутуурдаах үлэлииргэ да ордук.
Онон бу күннэргэ олохтоохтор, отторун быраҕан туран, ойуур баһаарын умуллара сылдьаллар. Нэһилиэкпит дьоно-сэргэтэ, ким туох кыахтааҕынан көмөлөһөллөрүгэр махталым муҥура суох. Ол курдук, Николай Столярчик биир туонналаах цистернатын, Степан Кривошапкин прицебин, Степан Березкин «Беларусь» тыраахтарын уларыстылар. Олохтоох дьаһалта «Беларуһун» уонна уу баһар массыынатын илдьэ сылдьабыт. Субуотунньукка саастаах дьон, орто саастаах дьон, оскуола оҕолоро кытталлар.
Төрүт нэһилиэгин олохтоохторо былыр былыргыттан бэйэ-бэйэлэрин өйүүр, төрөөбүт нэһилиэктэрин туһугар бары кыахтарын ууран көмөлөһөр үгэстэринэн, киэһэ хойукка диэри баһаары умуруорууга сылдьаллар. Бу күннэргэ Өймөкөөҥҥө ардах түспэт, итии күннэр тураллар. Ол иһин үрдүкү инстанцияттан IV кылаастаах баһаар туһунан иһитиннэрии кэллэ.
Елена ПОТОЦКАЯ, «Саха сирэ» хаһыат, edersaas.ru