Өрөспүүбүлүкэ улуустарыттан Ньукуолун чэчиэринньигин ким хайдах көрсүбүтүн туһунан батсаабынан сонун арааһа кэллэ.
Елена ПОТОЦКАЯ, «Саха сирэ» хаһыат, edersaas.ru
Өймөкөөн Төрүтүгэр оҕотуттан ытык кырдьаҕаһыгар тиийэ ох курдук оҥостон, оһуохай күөн күрэһигэр кытыннылар.
Үөһээ Бүлүүттэн төрүттээх алын сүһүөх кылаас учуутала Варвара Катанова оһуохайы таһаараатын кытта, оскуола кэлэктиибэ икки өттүттэн кынат буолан, тэҥҥэ барсан истилэр.
Кулууп саалатыгар киһи толору буолан, баппакка, сцена кытта оһуохайдьыттарынан туолла.
Бүлүүттэн төрүттээх нэһилиэк ытыктанар кырдьаҕаһа, Төрүтү иккис дойду оҥостубут убаастанар күтүөт, култуура бэтэрээнэ, 70 саастаах Николай Захаров «Бастыҥ оһуохайдьыт» номинацияҕа тигистэ. «Чуор куолас» номинация хаһаайкатынан Пантелеймон Тулааһынап аатынан Култуура дьиэтин дириэктэрэ Надежда Босикова буолла. «Уус-уран оһуохайдьыт» аат Төрүттээҕи оҕо уһуйаанын иитээччитигэр, нэһилиэк сэбиэтин дьокутаатыгар Наталья Каландароваҕа тигистэ. «Биһирэмнээх оһуохайдьыт» — аат Варвара Катановаҕа, оттон «Кэскиллээх оһуохайдьыт» номинация Герасим Кривошапкин аатынан орто оскуола үөрэнээччитэ Варя Кривошапкинаҕа тигистилэр.
Төрүт олохтоохторо кэлиҥҥи кэмҥэ араас тэрээһиннэргэ оҕолуун улахан дьоннуун бары түмсэн кыттар буолан, кулууптара кыараҕаһын дьэ биллилэр. Билигин нэһилиэккэ саха таҥаһа суох киһини булбаккын. Быйылгы сыл саҕаланыаҕыттан төрүттэр Пааналарын кулуубугар улуустааҕы суолталаах тэрээһиннэри хото ыыттылар. Төрүт олохтоохторо Пантелеймон Тулааһынаптарын кинилэр Тарыннарын дорҕоонноохтук ааттаппыт буолан, таптаан «Паана» диэн ааттыыллар.
Оһуохай куонкуруһун тэрийбит кулууп үлэһиттэрэ куонкурус кыттыылаахтарын сааскы бастакы куһунан уонна минньигэс алаадьынан күндүлээтилэр.
Елена ПОТОЦКАЯ, «Саха сирэ» хаһыат, edersaas.ru