Өймөкөөн Төрүтүгэр эдэрдиин-эмэнниин хайыһарга күрэхтэстилэр
Өймөкөөн улууһун Төрүт нэһилиэгин олохтоохторо төрөөбүт нэһилиэктэрин, улуустарын сайдыытыгар кылааттарын киллэрбит биир дойдулаахтарын ааттарын үйэтитэр бэлиэ тэрээһиннэри ыытар буолбуттара үгэскэ кубулуйда.
edersaas.ru
Ол курдук, Төрүккэ өр сылларга нэһилиэк баһылыгынан үлэлээбит, хайыһарга ССРС спордун маастара Дмитрий Прокопьев аатынан хайыһарга улуустааҕы күрэхтэһии уонча сылы быһа тиhиктээхтик ыытыллар. Кэрэхсэбиллээҕэ, 70-с сылларга оскуола оҕолорун Серафим Федоров хайыһарга уһуйбута, билигин үксүлэрэ хайыһардыыллар. Педагогическай үлэ бэтэрээнэ билигин Уус Алдан улууһун Суотту нэһилиэгин бочуоттаах олохтооҕо. Аныгы үйэ диэх курдук, батсаап нөҥүө бүгүн хайыһар күрэхтэһиитэ хайдах барбытын күнү быһа интэриэһиргии олордо:
— Хаартыскаттан көрдөххө, үчүгэй тэрээһиннээх күрэхтэһии. Ханнык ньыманан сүүрдүлэр: классическай дуу, «коньковай» дуу? Хас хамаанда кытынна? Уолаттар, кыргыттар хас килэмиэтиргэ сүүрдүлэр? Техническэй түмүктэри суруйан ыыттаргыт бэрт буолуо этэ. Бэтэрээннэр көрдөрүүлэрэ хайдаҕый? Оскуола оҕолорун көрдөрүүлэрин урукку оҕолорбор тэҥнээн көрөөрү гынабын.
Улуустааҕы буолан, сыл аайы бу күрэхтэһиигэ ыраах диэбэккэ, Өймөкөөн нэһилиэгин орто оскуолатын хайыһардьыттара кэлэн кытталлар. Быйылгы күрэхтэһии Дмитрий Прокопьев төрөөбүтэ 65 сылыгар ананна. Прокопьевтар дьиэ кэргэн анал бириистэрэ хайыһардьыт сиэннэригэр, 2-c кылаас үөрэнээччитигэр Эрхан Прокопьевка ананна.
— Хамаанданан күрэхтэһиигэ Төрүт орто оскуолатын үөрэнээччилэрэ бастаатылар. Өймөкөөн орто оскуолатын сэттэ киһилээх хамаандата эмиэ бэркэ кытынна. Спорт бырааһынньыгын ыччаттар уонна бэтэрээннэр хамаандалара киэргэттэ. Олохтоох дьаһалта, оскуола, балыыһа, оҕо саада анал бириистэрин туттардылар, — диэн Төрүт орто оскуолатын учуутала Елена Черемкина иһитиннэрдэ.
Хайыһар күрэхтэһиитин нэһилиэк баһылыга Семен Босиков бэйэтинэн көҕүлээтэ.
Ыччаттарга Алексей Сергеев үчүгэй бэлэмнээҕин көрдөрдө, бастаата.
Бэтэрээннэргэ оскуола физкультураҕа учуутала Павел Атласов бастаата. Бэлиэтээн эттэххэ, Павел Семенович учуутала Серафим Даниловичка такайыллыбыт буолан, спорт бары өттүгэр дэгиттэр талааннаах. Хайыһарга — оскуолаттан бастыҥ, тустууга өрөспүүбүлүгэ аатырбыт чөмпүйүөнэ Рустам Машарипов оскуолатааҕы бастакы тренерэ буолара үгүһү этэр.
Бэтэрээннэргэ Арассыыйаҕа тиийэ биллибит марафонец, 62 саастаах Виталий Атласов 2-c миэстэни ылла.
Үөрэнээччилэргэ: уолаттарга — Сандал Атласов (иккис эрээккэ хаҥастан төрдүс) бастаата.
Кыргыттарга соторутааҕыта «Тымныы полюһа-Өймөкөөн Кэрэ Куота» кыһыҥҥы туризм бэстибээлин куонкуруһугар ситиһиилээхтик кыттыбыт Камилла Чачуа бастаата.
Оттон кини дьүөгэтэ Ася Кривошапкина 3-c бочуоттаах миэстэҕэ тиксэн, эмиэ ситиһии көтөллөннө.
Ити курдук,нэһилиэнньэтэ төһө да аҕыйах ахсааннаах буоллар, Өймөкөөн Төрүтүн олохтоохторо кыралыын-улаханныын улуустааҕы суолталаах спортивнай күрэхтэһиилэри тэрийэн, бэрт сэргэхтик олороллор.
Елена ПОТОЦКАЯ, «Cаха сирэ» хаһыат, edersaas.ru
Хаартыскаларга Елена Черемкина уонна Анфиса Кривошапкина түһэриилэрэ.