Бүгүн Атласовтар этнографическай уһаайбаларыттан Горнай улууһугар ыытыллар Манчаары оонньууларыгар Тымныы полюһа Өймөкөөн улууһун спортсменнарын улуус салалтата анаан алҕаан атаарда.
Улуус баһылыга Иннокентий СИВЦЕВ бэлиэтээбитинэн, Өймөкөөн улууһун спортсменнара 4-с бөлөххө киирсэн, кыайыы иһин күрэхтэһиэхтэрэ. Иннокентий Семёнович Тымныы полюһуттан Манчаары оонньууларыгар кыттар 40 эдэр спортсмеҥҥа эрэлин биллэрдэ:
«Бэҕэһээ Өймөкөөн спортсменнара биир санаанан уопсай мунньахха Өймөкөөн улууһун спортивнай хамаандатын хапытаанынан өрөспүүбүлүкэ ааттаах-суоллаах спортсменын, көҥүл тустууга уонна хапсаҕайга спорт маастарын, краповай бэриэт хаһаайынын, Төрүт нэһилиэгиттэн төрүттээх Рустам Машариповы таллылар.
Өймөкөөн спортивнай хамаандата хапсаҕайга, мас тардыһыытыгар, чэпчэки атлетикаҕа, хотугу многоборьеҕа, гиирэ спордугар, ох саанан ытыыга кыттыаҕа. Быйылгы хамаанда улуус бары нэһилиэктэриттэн эдэр дьонтон таҥылынна. Онон ыччаттарбытыгар эрэлбит сүҥкэн. Төрөөбүт Өймөкөөҥҥүт эһиэхэ эрэнэр уонна эһигини кыайыы көтөллөөх сырдык дьаралыкка куустаран кэлэргитин күүтэр», — диэн улуус хас биирдии нэһилиэгиттэн ыччаттарбытыгар алгыс тылларын ыыталларын эттэ.
Өймөкөөн улууһун эдэр спортсменнарыгар — Кыайыыны!
Елена ПОТОЦКАЯ, «Саха сирэ» хаһыат, edersaas.ru