Маны аах Уопсастыба

Өймөкөөн оскуолатын тэлгэһэтин киһи билбэт буолла

Бу күннэргэ Өймөкөөн улууһун «Өймөкөөн Тымныы Оройо» муниципальнай тэриллии нэһилиэгэр икки бүк үөрүүлээх түгэн буолла.

Бу туһунан олохтоох дьаһалта сүрүн исписэлииһэ Наталья Реброва бу курдук иһитиннэрдэ:

– Бу күннэргэ “ППМИ” бырагырааматынан Н.О. Кривошапкин аатынан Өймөкөөн орто оскуолатын тас көрүҥүн тупсарар үлэ түмүктэнэн, үөрүүлээх быһыыга-майгыга аһыллыыта буолла. Улахан үлэ ыытылынна – оскуола тэлгэһэтин киэҥ сирин тэҥнээн кумах, таас, буор кутттулар, тимир олбуор оҥоһулунна, 70 лаампа олбуор тула сандаарда. Оҕо-аймах оонньууругар, сынньанарыгар аналлаах араас тутуулары туттулар. Ол курдук, манна сынньалаҥ беседката дьэндэйдэ, олорорго сөптөөх хас да ыскамыайка, ууруна, оҕо былаһааккалара, бэртээхэй тротуар тэлгэтилиннэ. Олохтоох уус Семен Сивцев бэрт ураннык чочуйан, Н.О. Кривошапкиҥҥа өйдөбүнньүк-бюст оҥорон туруорда.

Бу үлэ барыта “Оскуола тас көстүүтүн тупсарыы” диэн Норуот көҕүлээһинин бырагырааматын чэрчитинэн оҥоһулунна. Үлэ үбүлээһинэ – 4 мөл. 500 тыһыынча солкуобай.

Махтал тылын бастыҥын этэбит бүгүн күүс-көмө буолбут спонсордарбытыгар: «Богуславец» ХЭУо – 2 мөл. 450 тыһ. солк.; оройуон бюджетыттан – 450 тыһ. солк.; олохтоох нэһилиэнньэ — 100 тыһ. солк.; СӨ Үп министиэристибэтэ – 1 мөл. 500 тыһ. солк. көмөлөстүлэр.

Олохтоох нэһилиэнньэ, оскуола кэлэктиибин — үөрэнээччилэрин, учууталларын аатыттан барҕа махталбытын Өймөкөөн улууһун дьаһалтатын баһылыгар Иннокентий Сивцевкэ тиэрдэбит. Баһылыкпыт бу үлэ саҕаланыаҕыттан бүтүөҕэр диэри бэйэтинэн хонтуруоллаан, кыстыкка кииириигэ быйыл нэһилиэкпитигэр улахан суолталаах иккис улахан эбийиэктэннибит. Былырыын баччаларга “ППМИ”-нэн Кыайыы болуоссата үлэҕэ киирбитэ. Онон Иннокентий Семенович баһылыгынан үлэлиэҕиттэн Тымныы полюһунан аан дойдуга аатырар Өймөкөөн нэһилиэгэ харахха быраҕыллардык тубуста. Нэһилиэк дьаһалтатын баһылыга *Павел Васильев* СӨ Үп министиэристибэтигэр, «Богуславец» ХЭУо салалтатыгар, «ГотекСтрой» генеральнай дириэктэригэр *Александр Готовцевка* , олохтоох нэһилиэнньэҕэ, тэрилтэлэр салайааччыларыгар, истиҥ махталын тиэрдэр. Түгэнинэн туһанан, баһылыкпытыгар Павел Валентиновичка олохтоохтор маталбыт муҥура суоҕун бэлиэтиибит. Дьаһаллаах баһылыктаах буолан, нэһилиэкпит кэлиҥҥи сылларга сайдыы суолун тутуста. Онон кырдьаҕас Өймөкөөн нэһилиэгин олохтоохторо бу ааттаммыт дьоммутугар кытаанах доруобуйаны, үлэҕэтигэр өссө үрдүк ситиһиилэри, дьиэ кэргэҥҥитигэр уһун дьоллоох олоҕу баҕарабыт!

Иккис үөрүүлээх түгэммитинэн нэһилиэкпит үс сэлиэнньэтигэр: Өймөкөөҥҥө, Хара-Тумулга, Биэрэк-Үрдүгэр “ППМИ” бырагырааматынан уулуссалары уот ситимигэр холбуурга эбии сырдатар диоднай лаампалары туруоруу буолла.

Сырдатыы үлэтин Дьокуускай куораттан урбаанньыт Сергей Иванов оҥордо. Уопсайа 96 диоднай саҥа лаампа эбии турда. 2 км 500 миэтэрэ «СИП» провод тардылынна уонна 36 саҥа эбии уулуссаны сырдатыыга тирэх остуолба оҥоһулунна.

Уулуссалар сырдыылларыгар уопсайа 2 мөлүйүөн 237 тыһ. солк. 56 кэп. көрүлүннэ. Ол курдук, 21 647,38 солкуобай — нэһилиэк дьаһалтатыттан, 115 450,87 солкуобай — нэһилиэнньэттэн, 310274,22 солкуобай — спонсорскай көмө харчы киирбитэ. Бу күнтэн төрөөбүт дойдубут сэлиэнньэлэрэ бары, ырыаҕа ылланардыы, кырдьык да санаабытыгар, “тыһыынчанан уот лаампаларынан» сандаардылар, уулуссалар сырдаатылар. Уулуссалары сырдатыы үлэтигэр үбүнэн харчынан көмөлөспүт, биһиги нэһилиэкпит тирэҕэр уонна өйөбүлүгэр — көмүс хостуур «Богуславец» ХЭУо-ҕа уонна СӨ Үп министиэристибэтигэр Өймөкөөн нэһилиэгин дьонун-сэргэтин аатыттан улахан махталбытын тиэрдэбит!

Дойдубут барахсан куруук сырдыы, кэнчээри ыччаты кэрэҕэ-үтүөҕэ ыҥыра угуйа туруоҕа диэн эрэнэбит.

…Ити курдук Өймөкөөн улууһун биир кырдьаҕас нэһилиэгэ, аан дойдуга «Тымныы полюһунан» аатыран, Саха сирин омук туристарын кытта ситимниир Өймөкөөн сыл аайы тупсар, киэркэйэр.

Елена ПОТОЦКАЯ.

2
0