Быйыл Н.О. Кривошапкин аатынан Өймөкөөн орто оскуолатын 13 оҕо бүтэрэр.
edersaas.ru
Выпускниктар оскуолаларын тэрээһиннэриттэн саҕалаан, улуустааҕы, өрөспүүбүлүкэтээҕи, Арассыыйатааҕы уонна аан дойдутааҕы таһымнаах араас куонкурустарга, олимпиадаларга, кэмпириэнсийэлэргэ, быһата, хотунан-соҕуруунан бары суолталаах тэрээһиннэргэ миэстэлэһэн, кыайыы сырдык дьаралыгар куустарбыт оҕолор.
Сыл аайы «Өймөкөөн – Тымныы оройо» муниципальнай тэриллии дьаһалтата уонна «TURUU TOURS» турагенство кыттыһан, оскуоланы бүтэрэр туйгун үөрэнээччилэргэ, оскуола уопсастыбаннай олоҕор кыттар актыыбынай оҕолорго харчынан бириэмийэ туттарыылара үгэскэ кубулуйда.
— Былырыын күн сириттэн хомолтолоохтук барбыт биир дойдулаахпыт, улахан меценат-урбаанньыт Александр Крылов кэриэһигэр анаммыт харчынан сэртипикээти быйыл оскуоланы бүтэрбит 13 выпускнигар барыларыгар туттардыбыт, — диэн кэпсиир нэһилиэк баһылыга Павел Васильев.
Ол курдук, бастыҥ үөрэнээччи Арина Слепцова – 8500 солк., оскуола актыбыыстара: Надежда Винокурова, Чугдаара Кривошапкина, Аида Сукулова, Лилиана Стефанчук, Владлена Туприна – 6000 солк.; бастыҥ спортсменнар: Николай Атласов, Петр Готовцев, Петр Дьячковскай, Александр Сивцев, Дьулуур Степанов, Никифор Сукулов, Гаврил Степанов – 4500 солк. сэртипикээтинэн наҕараадаланнылар. Олохтоох дьаһалта анаабыт 10000 солк. сэртипикээтин Дьулуур Степановка туттардылар.
Оскуоланы бүтэрээччилэргэ «Өймөкөөн – Тымныы оройо» муниципальнай тэриллии дьаһалтатын баһылыга Павел Васильев оскуолатааҕы кэмнэригэр ылбыт тэтимнэрин ыһыктыбакка, төрөөбүт дойдуларыгар бэриниилээх уонна туһалаах дьон буолан, олох суолун устун ситиһии, табыллыы кынаттанан, эрэллээхтик баран иһэллэригэр баҕарда.
Елена ПОТОЦКАЯ, «Саха сирэ» хаһыат, edersaas.ru