«Аҕам саастаах дьоҥҥо кыһамньы» тус сыаллаах муниципальнай бырагыраама Тымныы полюһугар — Өймөкөөн улууһугар 2012 сылтан үлэлиир.
— Аҕам саастаах дьон күнүгэр анаммыт дэкээдэ чэрчитинэн бу күннэргэ Жатай бөһүөлэгин урбаанньыттарыттан сибиэһэй хаппыыста атыылаһан, улуус киинигэр тиэйэн аҕаллыбыт. Ол ону нэһилиэктэр уонна бөһүөлэктэр баһылыктара бэйэлэрин ытык кырдьаҕастарыгар, соҕотоҕун олорор саастаах дьоҥҥо уонна инбэлииттэргэ босхо түҥэтиэхтэрэ, — диэн улуус баһылыга Иннокентий Сивцев иһитиннэрдэ.
Бу күннэргэ улуус киинигэр уонна нэһилиэктэргэ хаппыыстаны түҥэттилэр.
Бүгүн Төрүт нэһилиэгэр сарсыардаттан күүтүүлээх оҕуруот аһын ытык кырдьаҕастарга түҥэттилэр.
Улуус аҕам саастаах дьоно, инбэлииттэр улуус баһылыгар Иннокентий Сивцевкэ болҕомтотун уонна кыһамньытын иһин барҕа махталларын тиэртилэр.
Елена ПОТОЦКАЯ, «Саха сирэ» хаһыат