Бүгүн Металлург күнүгэр — көмүсчүттэр идэлээх бырааһынньыктарыгар Саха сиригэр көмүһү хостооһун саҕаламмыта 95 үбүлүөйүн бэлиэтииллэр.
edersaas.ru
СӨ Бырамыысыланнас министиэристибэтин хайаттан урууданан хостооһун дэпэртээмэнин салайаччыытын солбуйааччы Владимир Дьяяконов бэлиэтииринэн, Өймөкөөн улууһун көмүсчүттэрэ Алдан оройуонун көмүһү хостуур тэрилтэлэриттэн иккис улахан көрдөрүүлээх буолан, инники күөҥҥэ сылдьаллар.
Онуоха өрөспүүбүлүкэҕэ эрэ буолбакка, дойдуга тиийэ биллэр АО «Тарыннааҕы көмүһү урууданан хостуур хампаанньа» ОУо (“ТЗРК”), “Западнай” САУо уонна «Поиск Золото» АУо курдук бөдөҥ көмүс хостуур тэрилтэлэр улууска көмүс хостооһунун көрдөрүүтүн тупсарарга төһүү оруоллаахтар.
— Өймөкөөн улууһун көмүс хостуур тэрилтэлэрэ былырыын 8 туонна кэриҥэ көмүһү хостообуттара. Бастыҥ көрдөрүүлээх Алдан оройуона – 12 туонна. Көмүс хостооһунун көрдөрүүтэ тэрилтэлэр материальнай тиэхиньиичэскэй базалара төһө кыамталааҕыттан олус тутулуктаах. Аныгы технологиянан көмүһү урууданан хостуур ньыманы баһылаабыт тэрилтэлэр анал фабрикалардаахтар,
үлэһиттэр олорор уонна үлэлиир усулуобуйалара бары өттүнэн тупсаҕай,
ыарахан уйуктаах, кыамталаах тиэхиньикэнэн толору хааччыллыылаахтар.
Улууска билигин да эргэ тэрилинэн үлэлиир көмүс хостуур тэрилтэ үгүс. Биллэн турар, кинилэр көрдүүрэлэрэ кыра.
Ол эрээри кэлиҥҥи сылларга Өймөкөөн улууһун көмүсчүттэрэ сыл аайы ылбыт таһымнарын түһэрбэттэр – аҕыстыы туонна көмүһү хостууллар, — диэн бэлиэтиир хайаттан урууданан хостооһун дэпэртээмэнин салайаччытын солбуйааччы Владимир Дьяконов.
Былырыын Өймөкөөн улууһугар оробуочай сырыытыгар Ил Дархан Айсен Николаев улуус көмүсчүттэрин кытта анаан көрсүбүтэ.
Көмүс хостуур бөдөҥ тэрилтэлэр үлэлиир усулуобуйаларын кытта билсэн баран:
— Өймөкөөн улууһа сэбиэскэй кэмтэн көмүс хостооһунун киининэн буолар. Урукку сылларга оройуоҥҥа уонтан тахса туонна көмүс хостонор этэ. Уларыта тутуу сылларыгар көмүс хостооһуна аҕыйаан, алта туоннаҕа тиийэ түспүтэ. Кэлиҥҥи сылларга Өймөкөөн улууһун көмүсчүттэрэ урууданан хостооһун ньыматын баһылаан, саҥа технологиянан үлэлиир буолан, көрдөрүүлэрин лаппа тупсардылар.
Онон сотору кэминэн көмүстээх Өймөкөөн сэбиэскэй кэминээҕи дорҕоонноох аатын-суолун төнүннэриэҕэ, — диэн Айсен Николаев бэйэтин эрэлин биллэрбитэ.
Бүгүн Өймөкөөн улууһун көмүсчүттэрэ үбүлүөйдээх идэлээх бырааһынньыктарын көмүһү сууйуу сезонун саамай үгэнигэр сылдьан бэлиэтииилэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.