Маны аах Уопсастыба

Өймөкөөн эдэр сылгыһыттара Кемеровоҕа кэллилэр

Бу күннэргэ Өймөкөөнтөн Москва куоракка айаннаан эрэр Тымныы полюһа —Өймөкөөн сылгыһыттара Дугуйдан Винокуров уонна Мичил Неустроев Кемерово куоракка кэллилэр.

Кинилэри Нуучча географическай уопсастыбатын Кемеровотааҕы салаата көрүстэ уонна куорат судаарыстыбаннай университетыгар “Тымныы полюһуттан Москваҕа тиийэ” диэн пресс-кэмпириэнсийэ тэрийдэ.

Дугуйдан Винокуров уонна Мичил Неустроев Нуучча географическай уопсастыбатын Саха сиринээҕи салаатыгар кинилэри өйөөн, Арассыыйа бөдөҥ куораттарыгар сырыыларын тэрийэллэригэр уонна бэлэмнииллэригэр ис сүрэхтэриттэн махтаннылар. Уолаттар 11 000 км ыраах айаҥҥа туруммут соруктарын сиһилии билиһиннэрдилэр:

Биһиги бу ыраах айаммытын Саха АССР 100 сыллаах үбүлүөйүгэр аныыбыт. Сүрүн сорукпут дойду киин куоратыгар диэри араас эригийиэннэргэ сылдьан, саха ата маннык ыраах айаны хайдах тулуйарын билиһиннэрии, туризм эйгэтигэр атынан айаны сайыннарыыга тус кылааппытын киллэрии,  Сахабыт сирин уонна төрөөбүт улууспутун – Тымныы полюһун Өймөкөөнү билиһиннэрии. Сылдьыбыт сирбит тухары тыа сиригэр дьон олорор укулаатын, сылгыны иитэр хаһаайыстыбалар үлэлэрин уопутун кытта билистибит, санаа атастастыбыт. Ол курдук, Бурятия өрөспүүбүлүкэтигэр, Иркутскай, Красноярскай кыраайдарга биһигини Нуучча географическай уопсастыбатын чилиэннэрэ уонна саха диаспоралара көрсөн, айаммытыгар улахан өйөбүлү оҥордулар.

Уолаттарбыт санааларын нууччалыы сайа этэллэрэ, толкуйдара, билиилэрэ киэҥэ, кырдьык, киһи эрэ истэ олоруох кэпсээннээх дьон.

Өймөкөөн эдэр сылгыһыттарын туһунан Кемероватааҕы «12 канал» «Сонуннар» биэриитэ кэпсээтэ.

Онно Дугуйдан Винокуров кыттан, ыраах айанын туһунан билиһиннэрдэ.

7 000 км сири баран, уолаттар сыалларыгар чугаһаатылар. Кемеровоҕа сылдьар Дугуйдан Винокуровы кытта сибээстэһэн, айаннарын туһунан билистим.

— Айаммыт этэҥҥэ баран иһэр. Кемерево кыраныыссатыгар чугаһаан иһэн, циклоҥҥа түбэстибит. Саас буолан, күнэ-дьыла хаар-ардах былаастаах. Эмиэ да күһүҥҥү халлаан курдук, эмиэ да сылаас. Аттар туруктара этэҥҥэ. Оппутун булабыт, дьон аара бэрсэллэр.

Сарсын аттар туйахтарын  боккуобалыахпыт. Киин сир буолан, массыына сырыыта элбэх. Бастаан утаа сэрэхтээх курдуга, кэлин аттыын-киһилиин маннык тыаска-ууска үөрэннибит. Аара аппытын сынньатарбытыгар гостиницаларга хонон, суунан-тараанан, сынньанан ылабыт. Бу күннэргэ Кемеровоҕа мин иккитэ балааккабын туруоран, онно хоннум. Салгыннаах сиргэ сытыахпын баҕаран ылабын, тыабын олус аҕынным. Балааккам Өймөкөөнүм тыатын санатарга дылы. Бастакы күммэр -15 кыраадыс тымныы, иккис күммэр -5 кыраадыс этэ.

Тиийбит куораппыт аайы каартаны көрө олорон, салгыы айанныыр маршруппутун оҥостобут. Новосибирскайга диэри 300 км барыахпыт. Нэдиэлэ курдук айанныырга суоттанабыт, — диэн санаатын үллэһиннэ ыраах айаҥҥа баран иһэр Өймөкөөн улууһун эдэр сылгыһыта Дугуйдан Винокуров.

Хорсун-хоодуот саха ыччаттарыгар санаабыттара, толкуйдаабыттара туолан иһэригэр баҕарабыт. Айаҥҥыт тухары “күөх уот” умайан истин, айаҥҥыт аартыга аһылла турдун!

 

 

Елена ПОТОЦКАЯ, “Саха сирэ” хаһыат, edersaas.ru

Хаартыска — Дугуйдан Винокуров тиксэриитэ.

2
0
Telegram @edersaas20