«Индигир» дьахталлар вокальнай ансаамбыллара тэриллибитэ 15 сылын туолла.
Бу бэлиэ сылларыгар А.Е. Кулаковскай аатынан норуоттар доҕордоһууларын дьиэтигэр «Өймөкөөн – бу тымныы полюһа» диэн айар киэһээлэрин оҥорбуттарын туһунан норуоттар доҕордоһууларын дьиэтин пресс-сулууспата иһитиннэрэр.
Ансаамбылы 2006 сыллаахха олунньуга Өймөкөөн патриота Тамара Николаевна Северьянова тэрийбит. Ырыаһыттар алта сыл устата салайааччыларын дьиэтигэр уонна Хотугу норуоттар дьиэлэригэр бэлэмнэммиттэр. Онтон 2012 сылтан, А.Е.Кулаковскай аатынан норуоттар доҕордоһууларын дьиэтигэр кэлбиттэр. Маныаха Өймөкөөн улууһун дьаһалтатыттан Мария Петровна Голикова-Кинкалакка, норуоттар доҕордоһууларын дьиэтин исписэлииһигэр Ольга Петровна Охлопковаҕа өйөбүллэригэр махтаналлар.
Пресс-сулууспа ансаамбыл бу 15 сыл устатыгар өрөспүүбүлүкэ уонна куорат тэрээһиннэригэр көхтөөхтүк кыттарын бэлиэтиир. Ол курдук, кыһыны атаарыыга, куорат төрөөбүт күнүгэр, Туймаада ыһыаҕар, онтон да атын күрэстэргэ, куонкурустарга куруук көхтөөх кыттыыны ылаллар диэн этэллэр. Манна даҕатан, 2017 сыллаахха Хабаровскай кыраайга «Бубен дружбы» диэн бэстибээлгэ 3 истиэпэннээх лауреат аатын ылбыттарын бэлиэтииллэр.
Репертуардарыгар 40-тан тахса ырыалаахтар. Төрөөбүт дойдуларын, Улуу Кыайыы, таптал, хоту дойду дьонун-сэргэтин туһунан, о.д.а. ырыалары бар дьонноругар бэлэхтииллэр. Художественнай салайааччылара Тамара Николаевна Северьянова, музыкальнай салайааччылара Сардана Андреевна Трифонова ансаамбылы сатабыллаахтык салайаллар, кыһаллан бэлэмнииллэр.
«Индигир» дьоро киэһээтигэр доҕотторо, бу кэлэктиип ырыатын сөбүлээн истээччилэр, ансаамбылга урут ыллаабыттар, норуоттар доҕордоһууларын дьиэтин айар кэлэктиибэ эҕэрдэлэрин тиэрдибиттэр. Истиҥ киэһээҕэ ансаамбыл кэлэктиибигэр истиҥ-иһирэх тыллар анаммыттар, махтал суруктар туттарыллыбыттар.