Өймөкөөҥҥө Москва эмчит учуонайдарын кытта сибээс олохтонно

Ааптар: 
Бөлөххө киир:

Бу күннэргэ Өймөкөөн улууһун баһылыга Иннокентий Сивцев Томтор нэһилиэгэр Москва куорат учуонай-быраастарын кытта көрүстэ.

Дойдуга биллэр, аатырбыт быраастар, ийэлээх уол Антонина уонна Евгений Лединнэр Тымныы полюһа Өймөкөөнү, аатырбыт Чысхаан хаар-муус резиденциятын көрүөхтэрин наһаа баҕараллар эбит. Онон Саха сиригэр үктэммиччэ, Тымныы полюһугар хайаан да сылдьарга санаммыттар. Оруобуна ол кэмҥэ Томторго өрөспүүбүлүкэ онколог-быраастарын биригээдэтэ үлэлии сылдьар эбит.

Өймөкөөн улууһун баһылыга Иннокентий Сивцев, түгэнинэн туһанан, эмчиттэри мунньан дьыалабыай көрсүһүүнү тэрийбитэ. Бу туһунан баһылык маннык кэпсээтэ:

— Мэдиссиинэ наукатын дуоктара, РУДН профессора, акушер-гинеколог Наталья Ледина өрөспүүбүлүкэ быраастарын кытта көрсүһүүгэ бэйэтин үлэтин уопутун үллэһиннэ.
Евгений Ледин мэдиссиинэ наукатын хандьыдаата, Москва аатырбыт «Медси» килииникэтин онколог-бырааһа, куртах-оһоҕос искэнигэр идэтийбит химиотерапевт оҥкологияны чинчийэр быраастары үөрэтэр, уһуйар. Учуонай-быраас Москва «Медси» клиникатыгар Өймөкөөн улууһун оройуоннааҕы балыыһатын биир бырааһын стажировкаҕа ыытарга этии киллэрдэ. Улууска эмчиттэр тиийбэт кыһалҕаларын ырытан баран, сотору кэминэн кэккэ бырайыактары олоххо киллэриэхпит.

…Ити курдук, Арассыыйа биир бэлиэ сиригэр аатырбыт эмчиттэр туристыы кэлэ сырыттахтарына, улуус баһылыга тоҕоостоох түгэни туһанан, Москва аатырбыт «Медси» килииникэтин кытта ыкса сибээһи олохтоото.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0