Сүрүн Тыа хаһаайыстыбата

Өймөкөөҥҥө Магадаантан — бастакы от

Быйыл кураан дьыл буолан, Өймөкөөн улууһа ыксаллаах быһыы-майгы балаһыанньалаах улуустар ахсааннарыгар киирбитэ.

Үөскээбит балаһыанньаны өйдөөн, сүөһүлээх дьону  өйөөн, улуус баһылыга Иннокентий  Сивцев уонна оройуоннааҕы тыа хаһаайыстыбатын управлениетын салайааччыта Павел Сивцев СӨ Тыа хаһаайыстыбатын министиэристибэтиттэн үп-харчы туруорсан, Магадаан уобалаһын пиэрмэрэ Сергей Комары кытта дуогабар түһэрсибиттэрэ.
Ойуур баһаарыттан эмсэҕэлээбит ходуһалардаах Өймөкөөн нэһилиэгин олохтоохторо сүөһүлэрин кыстатар отторун булунар соруктаах улуус дьаһалтатын кытта оту тиэйэр операторы — «Северное графство» ТХПК салалтатын кытта сөбүлэҥ түһэрсибиттэрэ.
Нэһилиэк дьаһалтатын сүрүннүүр исписэлииһэ Сардаана Степанова бу күннэргэ Өймөкөөн нэһилиэгэр Сеймчантан тиэллэн кэлбит от туһунан билиһиннэрдэ:
Биһиги нэһилиэкпитигэр быйылгы уонна былырыыҥҥы оту тиэйиигэ 69 хаһаайыстыбаттан (3-һэ бааһынай хаһаайыстыбалар)  401 туонна окко сайаапка киирбитэ. Бу сыл бүтүөр диэри 195 туонна от 49 кэтэх, 3 бааһынай хаһаайыстыбалаах дьоҥҥо кэлиэхтээх.
Сэтинньи 10 күнүгэр бастакы түһүмэх — 10 туонна от тиэллэн кэллэ. Ол оту
 ото суох ыксаабыт кэтэх хаһаайыстыбалаах 6 ыалга түһэрдилэр: Биэрэк.Үрдүгэр түөрт ыалга — 6, Өймөкөөҥҥө биир ыалга — 2, Хара Тумулга биир ыалга — 2 туонна оту тыырдылар.
Ити курдук, бу күннэргэ от тиэммит массыыналар  Магадаан уобалаһыттан утуу-субуу субуллаллар. Улуус баһылыга Иннокентий Сивцев суоппардарга туруорбут  туруорбут соруга — Тымныы полюһугар улахан тымныы түһүөр диэри от улахан аҥара тиэллэн кэлиэхтээх.

 

Елена ПОТОЦКАЯ, “Саха сирэ” хаһыат, edersaas.ru

 

Хаартыска – Елена Винокурова хаартыскаҕа түһэриитэ.

0
0
Telegram @edersaas20