Бу күннэргэ Өймөкөөҥҥө Кыайыы искибиэрин үөрүүлээхтик аһыы сиэрэ-туома буолла.
edersaas.ru
Тупсаҕай оҥоһуулаах нэһилиэк киинигэр турар искибиэр Өймөкөөн улууһун — 100, Улуу Кыайыы 75 сылларыгар анаан саҥардылынна.
Өймөкөөн Тымныы полюһун быһыытынан, туризм сайдыбыт түөлбэтинэн биллэр. Манна араас омук дойдуларыттан тоҕуоруһа мусталлар. Туристар нэһилиэк бэлиэ миэстэлэригэр хайаан да сылдьан ааһаллар. 285 сэрии уонна тыыл бэтэрээнэ, үлэ фронун кыттыылаахтара, сэрии сылын оҕолорун ааттара көмүс буукубанан нууччалыы, английскайдыы тылынан суруллан, үс улахан истиэндэҕэ үйэтилиннилэр.
Улуус салалтата уонна нэһилиэк уопсастыбанньыктара Улуу Кыайыыны уһансыбыт дьон сырдык кэриэстэригэр бу истиэндэлэргэ сүгүрүйдүлэр.
Сэрии сылларыгар Сэбиэскэй Сойуус үрдүкү наҕараадаларын ылбыт нэһилиэк ытык дьонун испииһэгэ истиэндэни ситэрэн биэрэр. Биир дойдулаахтарын ааттарын чопчулуурга улахан үлэни ыыппыт оройуоннааҕы «История өйдөбүнньүгэ» федеральнай бырайыак бэрэссэдээтэлигэр, кыраайы үөрэтээччи Тамара Васильеваҕа, олохтоох дьаһалта исписэлииһигэр Наталья Егороваҕа, бырайыак ааптара Сардаана Аммосоваҕа өймөкөөннөр барҕа махталларын тиэртилэр. Кыайыы искибиэригэр ытык дьон ааттара ааттанан, кинилэр дойдуларыгар иккистээн төннүбүт курдук буоллулар.
Искибиэри дьаһалта баһылыга Павел Васильев Үп министиэристибэтэ тэрийбит норуот көҕүлээһинин бырагырааматын чэрчитинэн сүүрэн-көтөн оҥоттордо.
Кыайыы искибиэрэ ситэриилээх былаас, олохтоох салалта, чааһынай бөдөҥ тэрилтэ, ону тэҥэ олохтоохтор биир сүбэнэн үлэлээбит түмүктээх үлэлэрин холобура.
Ол курдук, СӨ Үп министиэристибэтэ — 1 мөл 205924 солк,»Өймөкөөн оройуона» МТ дьаһалтата — 804 688 солк., Өймөкөөн нэһилиэгин кытта шефтэһэр көмүс хостуур тэрилтэ — «Богуславец» ХЭУо — 1 мөл. 449 769 солк.,»Өймөкөөн тымныы оройо» МТ дьаһалтата — 804 688 солк., Норуот көҕүлээһинин бырагырааматын чэрчитинэн олохтоох нэһилиэнньэ — 168 474 солк. кыттыһан, өрөспүүбүлүкэҕэ тиийэ тарбахха баттанар сүүнэ тутуу киһи киэн туттар эбийиэгинэн буолла. Тутууга уопсайа 4 мөл.433 544 солк. үп ороскуоттанна.
Федор Федосеев дириэктэрдээх «Сахасталь» тэрилтэ үлэһиттэрэ санааларын ууран туран үлэлээтилэр.
Тэрээһиҥҥэ муниципалитет баһылыга Иннокентий Сивцев кыттыыны ылла. Баһылык: «Кыайыы искибиэрэ эдэр көлүөнэни төрөөбүт Өймөкөөнүн устуоруйатын билэ улаатарыгар улахан суолталаах«, — диэн бэлиэтээтэ.
Елена ПОТОЦКАЯ, «Саха сирэ» хаһыат, edersaas.ru
Хаартыска: Ульяна Захарова түһэриитэ.