Ааспыт бээтинсэҕэ ыксаллаах быһыы-майгы биллэриллибит нэһилиэктэрин балаһыанньаларын билсэ, Өймөкөөн улууһугар бырабыыталыстыба хамыыһыйата тиийэн үлэлээтэ.
edersaas.ru
Хамыыһыйа састаабыгар Ил Түмэн депутата Василий Местников, тыа хаһаайыстыбатын миниистирин солбуйааччы Виктор Павлов, халаан содулун туоратар дирекция уу хаһаайыстыбатын техническай отделын салайааччыта Василий Давыдов, катастрофа медицинатын киинин кыл. бырааһын солбуйааччы Ксения Фадеева, Роспотребнадзор управлениетын бырааһа Константин Старостин, Ыксаллаах быһыы-майгы кылаабынай управлениетын халаантан сэрэтэр отделын салайааччыта Александр Никифоров үлэлээтилэр.
Бырабыыталыстыба хамыыһыйатын өрөспүүбүлүкэтээҕи Нэһилиэнньэҕэ куттал суох буолуутун хааччыйар судаарыстыбаннай кэмитиэт бэрэссэдээтэлин э.т. Дмитрий Лепчиков салайда.
Хамыыһыйа халаантан эмсэҕэлээбит нэһилиэктэри «Восток» ХЭУо көмүсчүттэр тэрилтэлэрэ биэрбит бөртөлүөттэринэн көтө сылдьан сиһилии көрдө-иһиттэ.
Өймөкөөн нэһилиэгэр хамыыһыйа чилиэннэрэ балаһыанньаны мотуордаах оҥочонон сылдьан көрдүлэр-иһиттилэр.
Нэһилиэккэ «Теплоэнергосервис»АУо кыһыҥҥы суолунан тиэйбит таас чоҕо ууга барда. Оттуур ходуһа ууга сытар.
Оттон Сордоҥнооххо айан суола алдьанан, бараары-кэлээри ыксыыр дьон уу алдьаппыт сирдэрин сатыы туоруу сылдьаллар.
Бу күннэргэ отчуттарга былдьаһыктаах кэмнэр үүнэннэр, ордук кинилэр эрэйи көрөн эрэллэр. Балаһыанньаны миэстэтигэр тиийэн билсэн баран, Тыа хаһаайыстыбатын министиэристибэтин тустаах салайааччылара халаантан эмсэҕэлээбит Өймөкөөн улууһун нэһилиэктэрин өйүүргэ туһуламмыт сүбэ мунньаҕы ыыттылар.
Бүгүҥҥү күҥҥэ улуус 1840 га ходуһатыттан 920 га (50%) ууга сытар. Кэтэх хаһаайыстыбаларга 722 ынах, 658 сылгы иитиллэн турар.
Сүөһүнү этэҥҥэ кыстатарга хаһаайыстыбалар балаһыанньаларын өйдөөн туран, Тыа хаһаайыстыбатын министиэристибэтин иһинэн үлэлиир хамыыһыйа тустаах быһаарыы ылла:
1. «Өймөкөөн улууһа» МТ баһылыга Михаил Захаровка:
- оттоммут оту үрдүк сиргэ тиэйиини ситиһэригэр;
- отчуттар биригээдэлэригэр, ыанньыксыттарга уонна сылгыһыттарга ууттан сэрэхтээх буолалларыгар үлэ ыытарын мэктиэлииргэ;
- сүөһү ахсаанын аҕыйаппат туһугар үлэни ыытарыгар;
- тиэхиньикэни уу ылбат сиригэр таһаарыыны дьаһайарыгар;
- халаантан эмсэҕэлээбит кэтэх хаһаайыстыбалартан окко уонна эбии аһылыкка көмө оҥорорго сайаапкалары хомуйууну тэрийэригэр;
- атырдьах ыйын 8 күнүгэр диэри хаһаайыстыбаларга оттооһуҥҥа көмөлөһөр устудьуоннар этэрээттэрин тэрийэр туһугар сайаапкалары хомуйарыгар.
2. Сир уонна мелиорация үлэтин дэпэртээмэнигэр:
- СӨ бырабыыталыстыбатын 03.08.2018 876-р N-дээх докумуонугар олоҕуран, Өймөкөөн улууһугар ыытыллыахтаах бюджеттэн үбүлээһини түргэтэтии;
- б.дь. атырдьах ыйын 7 күнүгэр диэри Сордоҥноох уонна Өймөкөөн нэһилиэктэригэр устудьуоннар этэрээттэрин күүһүнэн сүөһү аһылыгын бэлэмнээһин механизмын тобулуу;
- б.дь. атырдьах ыйын 6 күнүгэр диэри Өймөкөөн улууһун ходуһаларыгар халаан содулуттан тахсыбыт чопчу хоромньу туһунан иһитиннэриини бэлэмнииригэр;
- б.дь. атырдьах ыйын 7 күнүгэр диэри Өймөкөөн улууһугар үлэлэһэр эппиэттээх исписэлииһи ыытарыгар.
Атырдьах ыйын саҥатыгар Өймөкөөн улууһа быйыл бэһис төгүлүн халааҥҥа эмсэҕэлээтэ. Бу тухары өрөспүүбүлүкэ салалтата араас тэрээһин үлэни кэмигэр ыытан, хоромньу тута ааҕыллан-суоттанан, үгүс көмө оҥоһуллан, өймөкөөннөр кыһалҕаларын быһаартара олороллор.
Ыксаллаах быһыы-майгы министиэристибэтэ биллэрбитинэн, кэлэр нэдиэлэҕэ Өймөкөөн улууһугар эмиэ ардыыр буолан, улуус нэһилиэктэригэр уу өссө кэлэр кутталлаах.
Онон Өймөкөөн улууһун олохтоохторо ыксаллаах быһыыга-майгыга бэлэм олороллор.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.