Маны аах Тыа хаһаайыстыбата

Өймөкөөҥҥө көмө от Магадаан уобалаһыттан кэлиэҕэ

От ыйын 30 күнүгэр куйаар ситиминэн Ил Дархан Айсен Николаев сүөһү кыстыыр аһылыгын бэлэмнээһиҥҥэ туһаайыллыбыт киэҥ ыҥырыылаах  мунньаҕы ыыппыта.

Таатта улууһун дьаһалтатыгар ыытыллыбыт мунньахха Ил Түмэн дьокутааттара, бырабыыталыстыба  чилиэннэрэ, илин  улуустар баһылыктара кыттыыны ылбыттара.

Бу тэрээһиҥҥэ кыттыыны ылбыт Өймөкөөн улууһун баһылыга Иннокентий Сивцев  оттооһун сезона олус уустук балаһыанньаҕа саҕаламмытын бэлиэтээн туран, Төрүт, Өймөкөөн уонна Үчүгэй нэһилиэктэригэр буолбут ойуур баһаардара ходуһалары сиэн, улахан хоромньуну аҕалбыттарын холобурдаабыта.  Баһылык мунньахха  бэлиэтээбитинэн, бүгүҥҥү күҥҥэ улууска 1550  төбө ынах сүөһү, ол иһигэр 517 ыанар ынах,  5188 төбө сылгы, ол иһигэр 2395 төбө биэ иитиллэн турар.

Быйыл улууска сүөһүнү кыстатарга оттонотуохтаах от былаана — 3 960 туонна от. Оттооһун хампаанньатыгар 644 киһи кыттар, ол эбэтэр 282 звено. 48 звеноҕа 18 тыраахтар үлэлиир. От үүнүүтэ быстар мөлтөх – бырыһыанынан ыллахха, уулаах сиргэ 45-50%, хонууга — 10-15%. Быһа холуйан ааҕыынан, улууска 1210 туонна отунан көмө наада. Ону тэҥэ улуус салалтата 70 туонна эбии аһылыгы уонна 70 тонна зернофураһы аҕалтарар былааннаах.

Баһылык Иннокентий Сивцев иһитиннэрбитинэн, бу күннэргэ улуус салалтата Магадаан уобалаһыттан 2000 туонна  оту тиэйэн ыларга кэпсэттэ.

Улууска 22 киһилээх, 9 тиэхиньикэлээх 7 мобильнай биригээдэ үлэлиир.  Оттуур тэрили атыылаһыыга улуус бүддьүөтүттэн 850 000 солкуобай субсидияны көрүүгэ  тыырылынна.

30 км ыраах оттуур мобильнай биригээдэлэри өйөөн, улуус бүддьүөтүттэн үбүлээһин көрүллэрэ эмиэ былааннанар.  Улууска күһүҥҥү кэмҥэ ойуур баһаарыттан бэлэмнэммит оту көмүскүүргэ туһуламмыт үлэ баран эрэр. Ол курдук, экскаватор уонна МТЗ 82 тыраахтарга кэтэрдиллэр булуугу, мотопомпалары уонна электрогенератордары атыылаһыахтара.

 

Елена ПОТОЦКАЯ, “Саха сирэ” хаһыат, edersaas.ru

 

 

0
0