Өрөспүүбүлүкэтээҕи харах балыыһатын мобильнай биригээдэтэ сылын аайы киин сиртэн ыраах сытар нэһилиэнньэлээх пууннарга тахсан үлэлиир. Бу күннэргэ Өймөкөөн улууһугар үлэлииллэр. Бөлөҕү кылаабынай быраас Иван Луцкан салайан илдьэ сылдьар.
Иван Луцкан бэлиэтииринэн, мобильнай биригээдэ улуус баһылыга Иннокентий Сивцев ыҥырыытынан кэлбит.
— Киин сиртэн ыраах сытар улуустарга тахсан үлэлиибит. Үс күн устата биһиги исписэлиистэрбит кэлбит дьону барыларын хабан көрө сатыахтара. Бу ордук кырдьаҕас дьоҥҥо туһалаах, үгүстэр Дьокуускай куоракка кэлэн көрдөрөр кыахтара суох. Мобильнай биригээдэлэр бэйэлэрин кытары туох баар наадалаах тэриллэрин илдьэ сылдьаллар. Онон сөптөөх диагноһы туруорарга, эмтииргэ бары усулуобуйа тэриллэр, — диэн бэлиэтиир кини.
Аграфена КУЗЬМИНА