Өймөкөөҥҥө дьоҕурдаах оҕолор «сулустаах чаастара» умайда  

Ааптар: 
Бөлөххө киир:

Талааннаах уонна дьоҕурдаах оҕолору көрдүүр үөрэхтээһин өрөспүүбүлүкэтээҕи эспэдиисийэтэ Кэбээйигэ уонна Горнайга сылдьан баран, үһүс сырыытыгар Тымныы полюһугар Өймөкөөҥҥө үлэлээтэ.

Ускуустуба, наука уонна спорт эйгэтигэр талааннаах оҕолору сүүмэрдиир 15 киһилээх үөрэхтээһин үһүс өрөспүүбүлүкэтээҕи эспэдииссийэтин СӨ спорка солбугу бэлэмниир киинин салайааччытын солбуйааччы Аграфена Колесова салайан илдьэ сырытта.

Исписэлиистэр улуус киинигэр Уус Ньараҕа уонна Томтор, Өймөкөөн, Сордоҥноох, Үчүгэй нэһилиэктэригэр сылдьан үлэлээтилэр. Дьоҕурдаах оҕолор математикаҕа, физикаҕа анал олимпиадаларга кыттыыны ыллылар. Үөрэхтээһин эспэдииссийэтин исписэлиистэрэ оҕолору муусукаҕа, балекка уонна спорт араас көрүҥнэригэр тургутан көрдүлэр. Ол курдук, өй-санаа, эт-сиин өттүнэн сайдыыларын бэрэбиэркэлээн баран, исписэлиистэр төрөппүттэри, учууталлары, тириэньэрдэри кытта көрсөн кэпсэттилэр, маастар-кылаастары ыыттылар, сүбэ-ама биэрдилэр. Оттон «сулустаах чаастара» үүммүт талааннаах оҕолорго Дьокуускайдааҕы Муусука үрдүкү оскуолатыгар, Аксинья уонна Наталья Посельскайдар ааттарынан Балет оскуолатыгар, Наукалар дьоҕус Академияларыгар тиийэн үөрэнэргэ, чэпчэки атлетикаҕа, тустууга, буулдьанан ытыы көрүҥнэригэр өрөспүүбүлүкэ сүүмэрдэммит хамаандаларыгар эрчиллэлэргэ «күөх уоту» уматтылар.

Эспэдииссийэҕэ үлэлээбит исписэлиистэр улууска оҕо сайдыытыгар үөрэтии-иитии хайысхаларыгар ыытыллар үлэҕэ туох ситиһии уонна итэҕэс баарын кыраҕытык кэтээн көрөн баран, бэйэлэрин санааларын эттилэр. Ол курдук, бултаах-астаах улууска буулдьанан ытыы көрүҥүн сайыннарыы мөлтөҕүн бэлиэтээтилэр.

Ол да буоллар, ытыыга айылҕаттан айдарыылаах оҕолор көстүбүттэринэн, бу көрүҥү хайаан да сайыннарар сорук турарын тоһоҕолоон бэлиэтээтилэр.

«Модуҥҥа» тириэньэрдиир мас тардыһыытын аан дойдутааҕы чөмпүйүөнэ Евгений Удин маастар-кылааһын интэриэстээх оҕолор бэркэ сэргии көрдүлэр.

Наука, ускуустуба уонна спорт эйгэтигэр талааннаах оҕолору сүүмэрдиир үөрэхтээһин Үһүс эспэдииссийэтин үлэтин улуус баһылыга Иннокентий Сивцев сүрүннээтэ.

Эспэдииссийэ үлэтин үрдүктүк сыаналаан туран, талааннаах оҕолор кыахтарын кэмигэр таба көрөн сайыннарыы кэм ирдэбилэ буоларын бэлиэтиир тоҕоостоох. Бу үлэ улуус киинин уонна нэһилиэктэр олохтоох дьаһалталарыгар оскуолаларга, спортивнай оскуолаларга, култуура кииннэригэр оҕо талаанын сайыннарыыны өйүүллэригэр толкуйу сахта. Мантан инньэ нэһилиэктэргэ дьоҕурдаах оҕолору киэҥ араҥаҕа таһааран иһии биллэ күүһүрүөҕэ диэн эрэнэбин.

 Төһө да киин сиртэн ыраах олордорбут, спортивнай уонна култуурунай эбийиэктэрбит аныгы ирдэбилгэ толору эппиэттээбэтэллэр да, Өймөкөөн улууһун дьоҕурдаах оҕолоро сотору-сотору өрөспүүбүлүкэҕэ эрэ буолбакка, Арассыыйаҕа уонна аан дойдуга тиийэ араас куонкурстарга, научнай кэмпириэнсийэлэргэ кыттыыны ылан, ситиһиилэринэн үөрдэллэр.  Бу маннык эспэдииссийэлэр оҕолорбутугар болҕомтобутун күүһүрдэрбитигэр кыаҕы биэрэллэр. Исписэлиис көрүүтэ олох атын буоллаҕа. Онон бу үлэ өрөспүүбүлүкэ бары улуустарынан киэҥник ыытыллыан наада, — диэн исписэлиистэри кытта тэҥҥэ сылдьан баран, улуус баһылыга Иннокентий Сивцев санаатын үллэһиннэ.

Исписэлиистэр Өймөкөөн талааннаах оҕолоро киин сиргэ тиийэн сайдаллара төрөппүттэртэн быһаччы тутулуктааҕын бэлиэтээн туран, кэккэ оҕоҕо ааттарын ааттаан туран, Дьокуускайга тиийэн, хайаан да дьоҕурдарын сайыннаралларыгар сүбэлээтилэр.

Ол курдук, көҥүл тустууга Чурапчы оскуолатыгар үс оҕону, буулдьанан ытыы көрүҥэр үс оҕону, чэпчэки атлетикаҕа үс оҕону таллылар. Сүүмэрдээһиҥҥэ кыттыбыт исписэлиистэр «Тымныы полюһуттан тиийбит оҕолор олимпийскай резервэ оскуолатыгар үөрэнэн, эт-хаан өттүнэн сайдан, үрдүкү чыпчаалларга тиийиэхтэрэ» диэн эрэнэллэрин биллэрдилэр.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Василий Посельскай түһэриитэ.

+1
0
+1
0
+1
0
+1
0
+1
0
+1
0
+1
0