Сэтинньи 12 күнүгэр улууска алтынньы 25 күнүттэн сэтинньи 7 күнүгэр диэри быһыыны ылбыт уонна ревакцинацияны ааспыт дьоҥҥо анаан “Өймөкөөн улууһа (оройуона)” МТ дьаһалтата куйаар ситиминэн “СТОПКОРОНАВИРУС!” аахсыйаны тэрийэн ыытта.
Бу улууска быһыыны ылыыга улуус олохтоохторун көҕүлээһин биир көрүҥэ. Улуус баһылыгын солбуйааччы Станислав Глазков иһитиннэрбитинэн, суолталаах аахсыйа муҥутуур кыайыылааҕынан «Теплоэнергосервис» АУо Өймөкөөннөөҕү филиалын хачыгаара, Өймөкөөн нэһилиэгин Биэрэк Үрдэ түөлбэтин олохтооҕо Константин Константинович Кривошапкин (№ 402) буолла. Кини улуус дьаһалтата туруорбут кылаан бирииһигэр — 100 тыһыынча солкуобайга тигистэ!
Маны таһынан, 10 киһи 3000 солкуобайтан 20 000 солкуобайга диэри эмиэ харчынан бирииһи туттулар.
Улуус быһыыны ылыыга көрдөрүүтэ — 85 %. Биллэн турар, маннык көҕүлээһиннэр сыстыганнаах дьаҥы бохсууга олус улахан көдьүүстээхтэр.
Елена ПОТОЦКАЯ, «Саха сирэ» хаһыат, edersaas.ru