Бүгүн өрөспүүбүлүкэтээҕи суһал ыстаап брифинигэр Саха сиринээҕи гидрометеокиин салайааччыта Татьяна Маршалик «сылаас салгын маассата арҕааттан илин диэки сыҕарыйда» диэн биллэрдэ.
— Буруолаах итии салгын хамсаан, арҕаа улуустарга биллэ сөрүүкээтэ. Билигин буруолаах итии салгын Томпо, Өймөкөөн уонна Халыма-Индигиир улуустарын хабан, ол эҥэр куйааһырда уонна ол эргин хойуу буруо тунуйда. Бу күннэргэ ити улуустарга 30 кыраадыска тиийэ куйаарыаҕа, буруолаах буолуоҕа. Сөҥүү суох, — диэн бэлиэтээтэ Татьяна Маршалик.
Кырдьык, бу күннэргэ сөрүүкээн турбут күн-дьыл Өймөкөөн улууһугар бүгүн тосту уларыйда. Сарсыардаттан куйааран, улууска хантан кэлбитэ биллибэт хойуу буруо тунуйда.
Олохтоохтор социальнай ситимнэргэ «улуус киинигэр Уус Ньараҕа Үрбэ хайаҕа уот барбыт үһү» диэн сурах тарҕаппыттарыттан, мин Индигиирдээҕи лесниичэй Александр Любимовтан ыйыталастым. Онуоха Александр Александрович маннык бэлиэтээһини оҥордо:
— Өймөкөөн улууһугар Үрбэ хайаҕа баһаар бэлиэтэммэтэҕэ, онно ойуур баһаара суох. Хойуу баһаар буруота Алдан, Уус Маайа улуустарын эҥэриттэн уонна Хабаровскай кыраайтан кэлэр.
Ойуур баһаарын туһунан тустаах иһитиннэрии fires.ru саайтка тахса турар.
Онтон билсэ олоруохха сөп.
Бүгүн Өймөкөөн улууһун нэһилиэнньэлээх пууннарын тула туох да көстүбэт хойуу буруо тунуйда.
Елена ПОТОЦКАЯ, «Саха сирэ» хаһыат.
Хаартыскаҕа — ааптар түһэриитигэр Өймөкөөн улууһун Төрүт нэһилиэгин тула туох да көстүбэт хойуу буруо тунуйда.