«Эһэм Сивцев Семен Тихонович ыскааба. Улахан сыаналаах ыскаабым» , — диэн саҕалыыр кэпсээнин А.П.Бурнашева.
—Булдунан, сылгы-сүөһү иитиитинэн дьарыктаммыт. Атын көлүнэр тэрилин бэйэтэ оҥостубут, барыта баар. Сүүстэн тахса сыллааҕы. Ону сэргэ, оҕус тэрилэ баар. Сонуокка туттар кыраабыл оҥотторбут. Наһаа ыарахан. Былыргы оҥоһуулаах, тииһэ барыта түөрт муннуктаах. Сиэрпэ, алтан чаанньык, өтүүк икки арааһа, таас иһиттэрэ, суотайдаах арыгы бытыылката, көмүс ньуоската барыта ууруллан тураллар.
Бу эдьиийим сүктэн барарыгар тигиллибит суор5ан.Сарыы тарбах үтүлүк түүлээх истээх, буобура бохсуулаах. Ону сэргэ, дьахтар мааныга кэтэр быысапкалаах үтүлүгэ баар. Кыһыл саһыл истээх, буобурананан бохсуулаах. Бу ийэм тикпит, 80-ча сыллаах үтүлүктэр.
Былыргы этэрбэс билэтэ ордубута баар. Хара сукунаҕа халлаан күөх, кыһыл сукуна киллэриллибит уонна көмүс бүлтэгирдэринэн киэргэллээх. Арааһа эбэм киэнэ буолуо, Куличкина Анна Ивановна, Нам Хатырыгыттан сүктэн кэлбит баай ыаллар кыыстара эбит. Дьааханаан аҕа ууһуттан төрүттээх Мандар кинээс — Куличкин Филипп Филиппович сиэнэ эбит.
Сарыы уонна саары тумустаах этэрбэстэр. Этэрбэстэр сукунанан кыһыл, күөх хаймыылаах билэлээхтэр. Сарыы, кырса истээх кээнчэ ити эмиэ хара сукуна кыбытыылаах умнастыы тигиллибит дииллэр этэ. Ону сэргэ, былыргы сарт иһит – тымтай, балык сүгэллэр эбит. Биһиги кыра сылдьан амынньыардыыр этибит онтон отоннуур этим, 70-с сылларга сүгэ сылдьан. Билигин да үлэлиир сэпэрээтэрдээхпит. Таҕааҥҥа чугуун хобордооххо алаадьы буһараллара. Алаадьы эргитэр лаппаакы, хобордоох эргитэр ытарча, турбалаах сылабаар, чох өтүүгэ, чоххо уурар өтүүк, чох ылар сыпсы барыта бааллар. Саар ыаҕастар, мэһэмээн, ыаҕайалар, чабычах кэккэлээн тураллар. Алтан тутаахтаах иһити идэһэҕэ тутталлара. Ыһыырынньык, чугууннар, бурдук баһар хамыйах, кылынан өрүллүбүт бурдук сиидэтэ, лэппиэскэ буһарар лиис (ылтаһын). Барыта кэнчээригэ кэпсээн буолан тиһиллэн иһэр. Бу эдэр ыччат көрөрүгэр-билэригэр анаан ыыттым. Сиһилии видеоҕа, хаартыскаларга көрүҥ.
Анна Бурнашева,
Уус Алдан, Баатаҕай.
Видео А.Бурнашева тиксэриитэ