Чурапчыга орто үөрэҕи биэрэр оскуола 1943 сыллаахха аһыллыбыта. Ол иннинэ оскуолалар бары 7 кылаастаах этилэр. Педучилище 1934 сыллаахха аһыллыбыта. Онон үөрэнэн идэ ылар баҕалаах бастыҥ ыччат үксэ бу үөрэх кыһатыгар киирбитэ.
Бу 83 страницалаах ырыанньыкка 77 устудьуон 77 ырыаны суруйбут. Чэрэниилэнэн. Ырыалар аҥаардарыттан ордуга нууччалыылар. Бастакы ырыа 1941 сыл бэс ыйын 16 күнүгэр, бүтэһик, тиһэх сирэйгэ 1942 сыл сэтинньи 27 күнүгэр суруллубуттар. Тиэмэлэрэ сүнньүнэн үс түһүмэхтээх. Ол курдук гражданскай сэриигэ “Гулял по Уралу Чапаев герой”, “Партизан Железняк”, “Өрүөлчээн”, о.д.а.. Аҕа дойду сэриитигэр “Баҕар бүгүн, баҕар сарсын сэрии буолуо”, “Капитан Гастелло”, “ Поднимайся народ” о.д.а. Эйэлээх олоҕу көрдөрөр “Дьол, үөрүү ырыата”, “Песня о родине”, “Колхозная частушка” о. д.а.
Сталиҥҥа аналлаах үс ырыа баар – “Песня о Сталине”, “Казачья дума о Сталине”,” Сталин туһунан ырыа”.
Ырыанньык хаһаайката, мин учууталым, Вера Афанасьевна Листикова бу училищены бүтэрбитэ. Өр сыл учууталлаабыта. Ырыанньыгы балта илдьэ хаалбыта уолугар тиксибит. Кини эмиэ олохтон туораабыта. Онон кийиитэ илдьэ сылдьарын уларсан ылан бу куонкуруска кытыннарабын. Аата Антонина Егоровна Ксенофонтова.
Мин Алексей Михайлович Слепцовпун, Чурапчы улууһун, “Саҥа олох”’ хаһыатын эрэдээксийэтигэр үлэлиибин.
Алексей Слепцов,
Чурапчы.
Хаартыскалар А.Слепцов тиксэриилэрэ