Куонкуруска ыраах Ойуһардаахтан кыттабын.
Эбэм Шадрина Анна Васильевна Орто Халымаҕа Ойуһардаахха 1888 с. төрөөбүт. Кини ийэбэр Оконешникова Александра Ивановнаҕа 1950 с. хоппотун (сундуугун) бэлэхтээбит. Ньаалбаан тастаах мас хоппо, ойуулаах-дьарҕаалаах. Маны сэргэ, эбэбиттэн хаалбыт баахыла тимирэ баар. Ону нэһилиэкпитигэр урууга билигин да сөбүлээн уларсан баахылалыыллар.
Аны былыргы атахтаах иистэнэр массыыналаахпын, билигин да үчүгэйдик тигэр. Ийэм эдьиийэ Григорьева Елена Ивановна иистэнньэҥинэн уһуннук үлэлээбитэ. Кини массыынатын сиэнэ Саргылана Ибрагимовна соҕуруу көһөн барарыгар миэхэ хаалларбыта.
Эбэм кэргэнэ Винокуров Иван Алексеевич өбүгэлэрэ нэһилиэктэригэр кинээстээбиттэр, кулубалаабыттар. Ити маллар кинилэртэн хаалбыттар.
Маны сэргэ 5х5 см. таҥара мэтириэтэ ойууламмыт кыракый киэргэл баар. Саҥаһым Марта Прокопьевна эһэтэ Оконешников Николай Гаврильевич — айылҕаттан баардаах оҕонньор орто дойдуттан бараары сытан ийэбэр бэлэхтээбит. Ийэм, оччолорго 16-лаах кыыс, ылымаары гыммытын: “Ити оҕонньор мээнэ биэрбэтэҕэ буолуо. Ыл”, — диэбиттэр. Ийэм ону хойукка диэри хоппотун иһигэр хас эмэ хос өрбөххө суулаан уура сылдьыбыт.
Онтон ат ыҥыырын хоҥсуоччутун Горохов Николай Филиппович кэргэнэ Мотрена Степановна Горохова (Созонова) ийэбэр 1980-с сыллардаахха бэлэхтээбит. Николай Филиппович 1990 сыллаахха 90 сааһын ааһан баран орто дойдуттан барбыта, аҕата Уус Алдантан төрүттээх эбит.
Альбина Оконешникова,
Орто Халыма, Ойуһардаах
Хаартыскалар А.Оконешникова тиксэриилэрэ