Бу мэллээх иһит эбэм Елена Александровна Ядрихинская киэнэ.
Нам улууһун Хамаҕаттатыттан төрүттээх Елена Александровна (1900 с.т.), Иван Захарович (1902 с.т.) Ядрихинскайдар 14-тэ оҕоломмуттара өлөн, үрдүк айыылартан көрдөһөн, оҕо кутун хаайтарбыт иһиттэрэ. Ол кэнниттэн икки кыыс төрөөн, удьуордарын тэниппиттэр, кэнчээри ыччаттаммыттар. Улахан кыыс, мин ийэм, Степанида Ивановна өйдүүрүнэн, мэллээх иһиккэ түү мээчик баарын ылан, балтынаан Валентина Ивановналыын оонньууллара эбитэ үһү. Ийэбэр бу мэллээх иһит туһунан аҕатын бииргэ төрөөбүт балта Анастасия Захаровна Ядрихинская кэпсээбит уонна хоппоҕо уура сылдьыбытын биэрбит. Мэллээх иһит миэхэ ийэбиттэн, Степанида Ивановнаттан, тиксибитэ. Билигин бу ымыылаах иһиккэ оҕолорум кииннэрин, күн сирин көрбүттэрин туоһулуур бэлиэлэрин уган туруорабын.
Мэллээх иһит хас сыллаахха оҥоһуллубута, ханнык маастар айан-тутан таһаарбыта биллибэт. Иһит үрдүгэ 14 см. (хаппаҕа суох), аннын диаметра 16 см, үөһээ өттө 12,5 см. Туора охторуу ойууну, илим хараҕын туһаммыттар.
Елена Ядрихинская,
Таатта, Боробул.
Хаартыска Е.Ядрихинская тиксэриитэ.