Стручков Егор Дмитриевич II – Таӊара Мэнигэ сылабаара.
Мэӊэ-Хаӊалас Алтан нэhилиэгин Ɵлѳчѳй сэлиэнньэтин олохтооҕо Сидорова Марфа Афанасьевна дьиэ кэргэнигэр ѳр кэмӊэ харалла сыппыт чоҕунан оргутуллар сылабаар. Сылабаары 1957 сыллаахха Марфа Афанасьевна ииппит аҕатыгар Стручков Егор Дмитриевичка сылгыны энчирэппэккэ кѳрүү-харайыы, элбэх тѳрүѳҕү ылыы иhин бэлэх туттарбыттар. Бу мээнэ кѳстүбэт, сэдэх сылабаар. Ойоҕоhугар Саха сирэ Россия састаабыгар киирбитин бэлиэтиир үбүлүөйдээх сылыгар аналлааҕын туоһулуур суруктаах уонна сахалыы оhуордаах, тумуhун үрдүнэн Тыгын башнята, сиэрпэ уонна ѳтүйэ ойууламмыттар. Оччотооҕу кэмӊэ маннык сылабаар САССР салалтатын тус сакааhынан аҕыйах ахсаанынан оӊоhуллубут уонна үлэ чулууларыгар анаммыт буолуон сѳп.
Стручков Егор Дмитриевич Мэӊэ-Хаӊалас Алтан нэhилиэгин Ɵлѳчѳй сэлиэнньэтиттэн тѳрүттээх, 50-с сылларга колхуоска сылгы иитиитигэр Социалистическэй Υлэ Геройун А.Е.Степановы кытта бииргэ үтүѳ суобастаахтык биэс сыл үлэлээбитэ. 1947 сыллаахха «Саха АССР бастыӊ булчута» диэн аат хаhаайына. 1955 сыллаахха ыам ыйын 6 күнүгэр кини аатыгар Бүтүн сойуустааҕы норуот хаhаайыстыбатын быыстапкатын (БСНХ, Москва куорат) кыттыылааҕа буолбутун туоhуулуур сибидиэтэлистибэ суруллубут, мэтээл анаммыт. Ити сыл ахсынньы 19 күнүгэр БСНХ быыстапкатын үрүӊ кѳмүс мэтээлэ бэриллибит. Бу сылабаар билигин да туттуллар. Сааhын-үйэтин тухары хара тыаны кэрийэн, бултаан-алтаан элбэх күндү түүлээҕи туттаран, кварталлааҕы былаанын 111% толорон, элбэх тайаҕы сууhаран, соҕотох сылдьан эhэлээн байанайдаах бастыӊ булчут аатын ылыахтааҕын ылбыта. Егор Дмитриевич ѳссѳ биир улахан үтүѳтүнэн буолар нэhиэлигин дьонугар-аймаҕар үтүѳ сыhыана: 1957-58 сылларга саӊа туттубут дьиэтин элбэх оҕолоох Роман Поликарпович уонна Матрена Федоровна Бүлүүкүннэргэ босхо биэрбитэ, сайын аайы отчуттары кыыл этинэн хааччыйара.
Дьиэ кэргэнин кэриэс мала
Υрүӊ кѳмүс ытарҕа. Сидорова Марфа Афанасьевна ииппит ийэтиттэн хаалбыт үрүӊ кѳмүс сахалыы ытарҕа. Стручкова Ɵлѳѳнѳ (1900-1959 сс.) Стручков Егор Дмитриевичка кэргэн тахсарыгар илдьэ кэлбит ытарҕата. Былыргылыы кутуллан оӊоhуллубут, оhуордаах, саха ууhа оӊорбут улахан ытарҕата. Ɵлѳѳнѳ кулаактаммыт баай кыыhа эбит, ытарҕа ийэтиттэн кэлбит. Марфа бу ытарҕаны билигин да кэтэр.
Алтан кириэс. 18 үйэтээҕи алтан кириэс — Стручков Егор Дмитриевич кэргэнин дьонуттан хаалбыт мал. Россия историятын сыаннаhын быhыытынан билиниллэр, маннык кириэс Саха сиригэр революция иннинэ киэҥник тарҕаммыта үhү. Билигин дэҥ кэриэтэ кѳстѳр. Хаартыскалары манна көрүҥ.
Марфа Сидорова,
Мэҥэ Хаҥалас, Өлөчөй.
Хаартыскалар М.Сидорова тиксэриилэрэ