Саар ыаҕас.
Мин аҕабынан хос эбээм Индеева Варвара Николаевна ахсынньы 15 күнүгэр 1918 сыллаахха төрөөбүтэ. Киниэхэ ийэтиттэн Александрова Анна Дмитриевнаттан улахан туос ыаҕас хаалбыт. Ыаҕас быһа холоон 1905 сыллаахха оҥоһуллубут, ол аата 117 сыл буолбут. Ыаҕаһы ким оҥорбута биллибэт. Кини 32 см үрдүктээх. Сырдык туос, хара иилээх 2.5 см. Үөһээ өттүнэн талах иилээх, онтуката иҥиир сабынан оһуордуу тигиилээх. Түгэҕэ хос-хос тигиллибит, тэстибэт.
Урут итинник ыаҕаһы бары оҥорон тутталлара үһү, үүт, суорат куталлар. Эбэ Балбаара эмиэ туттар эбит, бурдук, сиэмэ кутар эбит. Кыра ыаҕаһы эбэбит бэйэтэ илиитинэн тикпитэ, өбүгэттэн хаалбыт иһит.
Ону таһынан эбэ Балбаара бэйэтэ тутта сылдьыбыт, өбүгэлэрбит оҥорбут мас, биир да тимир тоһоҕо туттуллубакка оҥоһуллубут хаппаларын кийиитигэр Индеева Надежда Владимировнаҕа уонна түүлээх таҥас угарга диэн сиэн кийиитигэр Индеева Саргылана Руслановнаҕа бэлэхтээбитэ.
Мас оҥоһук
Биһиги дьиэ кэргэммитигэр ытыктанар-харыстанар малтан биирдэстэрэ ийэм өттүнэн хос-хос эһэм Афанасьев Евсей Илларионович (1880-1967) бэйэтэ оҥорбут мал угар иһитэ буолар. Быһа холоон 1900 сылларга оҥоһуллубут. Түөрт муннуктаах, хаппахтаах иһит мастан оҥоһуллубут, кыһан ойуулардаах, сахалыы оһуордаах. Ону таһынан хос-хос эһэм оҥорбут, бэйэтэ тутта сылдьыбыт кытыйата уонна үс атахтаах чорооно бааллар. Кинилэр эмиэ мастан оҥоһуллан, сахалыы оһуор уруһуйдаахтар.
Ити малы биһиги билигин туттубаппыт, өйдөбүнньүк кэриэс курдук харыстыыбыт. Хаартыскалары көрүҥ.
Айсен Индеев,
Нам, Хамаҕатта.
В.П. Артамонов аатынан саха-француз лиссиэйин 6 кылааһын үэрэнээччитэ.
Хаартыскалар Индеевтэр тиксэриилэрэ