Бу мас остуол мин кырабыттан баар.
Бастаан утаа олох кыра сылдьан бырааттарбынаан кэчигирэһэн олорон аһыыр остуолбут этэ. Онтон алын сүһүөх кылааска уруок толорор остуолбут буолбута. Улаатан истэхпит аайы остуолбут анабыла биһигини кытта тэҥҥэ уларыйан иһэрэ. Биһиги аҕыс бииргэ төрөөбүттэр бары туттубут аҕай остуолбут.
Остуол ийэм Мария Андреевна Попова (1931 с.т.) анал кэриэс-хомуруос мала. Баара буоллар, 91-дээх буолуо этэ. Бу остуолу эһэтэ Иван Попов-Омуннаах Уйбаан (1850 с.т.) оҥорбут. Биир да тимир тоһоҕото суох, барыта мас хараҕанан туттарыллыбыт, бөҕө-таҕа. Үйэлэри уҥуордаан кэлбит мал диэтэххэ, дьөрү, кыратык да хамсаан көрбөтөх. Ийэм отуччалааҕар, эһэтэ 100 сааһын туолан баран орто дойдуттан бараахтаабыт.
Зоя Данилова,
Мииринэй, Таас Үрэх
Хаартыска З.Данилова тиксэриитэ