Эбэм Феодосия Елисеевна куобах кулгааҕыттан тикпит суорҕана баар.
Бу суорҕаны ийэбэр Елена Куприяновнаҕа, 1935 сыллаахха ыал буолбутугар, ийэтэ биэрбит. Ону ийэм миэхэ 1977 сыллаахха бэлэхтээбитэ. Оччотугар бу суорҕан эрдэ тигилиннэҕэ, ону ыйыппакка хаалбыт эбиппин. Суорҕан илиинэн аттарыллыбыт, бука, уһун үлэ буолуо. Наһаа күндүтүк саныыбыт уонна харыстыыбыт. Итиннэ даҕатан эттэхпинэ, алын сүһүөх кылааска үөрэнэрбэр, куобах кулгааҕа саҕынньахтаах этим. Маны таһынан, эбэм тикпит туос иһиттэрэ бааллар.
Ийэбит аҕата Куприян Павлович уонна кини бииргэ төрөөбүттэрэ мас, тимир уустара этилэр. Дьып-дьап курдук оҥоһуулаах хобордоох, баахыла тимирэ, ытарча, алаадьы эргитэр, таҕаан, лэппээски буһарар, чугууннар бааллара. Олор бииргэ төрөөбүттэрбэр бэриллибиттэрэ. Үрүҥ көмүһүнэн симэх оҥороллоро эбитэ үһү. Олортон миэхэ 19 үйэҕэ оҥоһуллубут солотуулаах ойуулаах үрүҥ көмүс биһилэх, үрүҥ көмүс кулгаах хастар бааллар. Олор ийэбиттэн хаалбыттара. Наһаа харыстыыбын, биирдэ эмэ илиибэр ылан көрдөхпүнэ дьоммун, оҕо сааспын саныыбын. Хаартыскалары көрүҥ.
Христина Федулова,
Чурапчы, Дириҥ.
Хаартыскалар Х.Федулова тиксэриилэрэ