Кэргэним Семён Васильевич хос эбэтин иһиттэрин уонна хос эһэтин Бысыин Никита Егорович сарыы этэрбэһин уура сылдьарбытын хаартыскаҕа түһэрэн ыыттыбыт.
Хос эһэбит 1974 сыллаахха 90 сааһыгар суох буолбут. Сарыы этэрбэһигэр куобах тириититтэн кээнчэ кэтэн баран бултуу барара үһү. Кээнчэтин хос эбэбит тигэр эбит. Ону сэргэ, ынах муоһуттан оҥоһуллубут буорах кутар иһитэ баар. Хаартыскаҕа буорах кутар иһитин кытары ботуруону иитэр тэрилэ баар. Ити эмиэ киниэнэ.
Оттон биир хос эһэбит Луковцев Дмитрий Семенович Байаҕантай улууһугар Баайаҕаҕа балыыһа туттарбыт. Кини кыыһыгар, ол эбэтэр биһиги эбэбитигэр Луковцева Мария Дмитриевнаҕа (1905 с.т.) балык иһити бэлэхтээбит. Эбэбит Мэҥэ Хаҥаласка сааһын тухары почта начаалынньыгынан үлэлээбитэ. Кинини Мэҥэ Хаҥаласка Почта Маайа диэн аатынан билэллэрэ. Балык иһит эбэбит киэнэ. Ону сэргэ, эбэбит уонна эһэбит баар хаартыскаларын ыытабыт. Хаартыскалары манна көрүҥ.
Вера Егорова,
Таатта, Ытык Күөл.
Хаартыскалар В.Егорова тиксэриилэрэ